El Principáu va pidir que se cambie la denomación de "Ría de Ribadeo"

"La Xunta Xeneral del Principáu aprobó'l vienres pasáu una proposición non de llei na que se-y pide al Conseyu de Gobiernu que se dirixa a l'Alministración central col envís d'iguar el topónimu de Ría de Ribadeo, adoptáu pol Conseyu Superior Xeográficu pa denomar a la Ría del Eo, adoptando asina esti topónimu, Ría del Eo, sobre la base de los datos sociales, sociollingüísticos, llexislativos ya históricos que pue apurrir el Gobiernu del Principáu d'Asturies.

El diputáu d'IX-BA-LV, Francisco Javier García Valledor, foi l'encargáu de defender la proposición non de llei, asegurando que delles veces dende la comunidá vecina cuestiónase l'asturianidá de dalgunos aspeutos del Eo, y llamentó ""l'escasu o nulu interés del Principáu por defender el sentir de los asturianos, asina como'l so ""poco pesu políticu énte l'Estáu y la so subordinación énte'l Gobiernu gallegu"".

Pela so parte'l diputáu del PP, Marcial González, llamentó que tenga de discutise otra vuelta na Xunta la polémica de la Ría del Eo, y aseguró qu'esti tipu d'alderiques xeneren desánimu ente los ciudadanos de la zona que se sienten ""abandonaos pol Gobiernu asturianu"". Asina, González denunció el ""colonialismu gallegu que quier metese n'Asturies ensin la oposición del Gobiernu asturianu"".Dende'l so puntu de vista'l Gobiernu espresa ""despreciu o desidia"" pa colos asturianos d'esa zona.
Pela so parte la diputada del PSOE, Mercedes Álvarez, aseguró na so intervención que lo que quier facer el Gobiernu Asturianu ye ""xustamente lo contrario"", yá que ta faciendo por cambia-y el nome que, dende los años 80, usa l'Institutu Xeográficu Nacional y que nun ye otru que Ría de Ribadeo."