Los ecoloxistes asturianos presenten alegaciones a la térmica Lada V - Llangréu

"La Coordinadora Ecoloxista d'Asturies acaba de presentar alegaciones al proyeutu d'una nueva central térmica de gas de 1100 Mw. con dos turbines de 550 Mw, allugada al llau de les actuales centrales térmiques de carbón en Lada - Llangréu, propiedá de la empresa IBERDROLA y sometíu a información pública nel trámite d'Evaluación del Impactu Ambiental y Autorización Ambiental Integrada.

L'asitiamientu propuestu pola empresa IBERDROLA pa los dos nuevos grupos termoeléctricos ye ""inadmisible"" pal grupu ecoloxista.

Dende la Coordinadora Ecoloxista recuerden que'l conceyu de Llangréu ""foi declaráu Zona d'Atmósfera Contaminada nel 1984, y dende entós sigue presentando unos niveles de contaminación del aire mui altos"". Nesi sen sorrayen que l'añu pasáu los niveles de proteición de la salú foron perpasaos 186 de los 365 díes del añu nesa zona.

Asina mesmo citen el Reglamentu d'Actividaes Molestes, Insalubres, Nocives y Peligroses del añu 1961, onde se conseña que ""les industries que puean ser consideraes como peligroses, insalubres o nocives namás van poder asitiase, como regla xeneral, a una distancia mayor de 2.000 metros del grupu de población más cercanu"", requisitu que, denuncien los ecoloxistes, nun se cumple nesti casu.

Pa finar, la Coordinadora Ecoloxista d'Asturies opónse, d'un mou más xeneral, a ""l'ampliación de la producción eléctrica nel nuestru territoriu, yá que ye claramente innecesaria nun contestu nel que yá se produz el doble de la enerxía eléctrica que se consume""."