CSI, CGT y SUATEA salen a la cai en Xixón

"Los sindicatos CSI, CGT, Suatea y Sindicatu Ferroviariu ficieron un llamáu a la participación na manifestación convocada en Xixón pa esti xueves 1 de Mayu, Día del Trabayador. La manifestación saldrá de la plaza l'Humedal a les 12.00 hores y finará nel Náuticu.

Nuna rueda de prensa celebrada na Casa Sindical, el secretariu xeneral de CSI, Juan Manuel Martínez Morala, el voceru de Suatea-Sindicatu Ferroviariu, Jesús de la Roza, y el responsable de CGT, Jorge Muñiz; sorrayaron qu'esti añu'l Día'l Trabayador/a coincide con una situación de crisis económica ""que naide sabe onde va llegar"", dixo Morala.

El secretariu xeneral de CSI faló tamién de les cifres de paru y la perda de 5.000 puestos de trabayu na Industria, el sector que tendría d'absorver a los paraos de la crisis de la construcción. Asina mesmo dixo que, al tiempu que xube'l paru tamién lo fai el preciu de la vida.

Pola contra, les midíes qu'aplica'l gobiernu, según Morala, tán empobinaes a ""da-yos perres a les inmobiliaries, constructores y a la banca, y a que nun xuban los salarios"". ""Ta ayudándose a los qu'esbarrumbaron el país col lladriyu"", criticó.

Los sindicatos tamién criticaron la emigración de la mocedá asturiana polos baxos salarios, en munchos casos menores a 600€. Amás, recordaron que demientres qu'anguaño xube'l preciu de la lleche por tar escasa, enantes multábase por producila."