Fin de selmana de Mercáu en Quirós

"L'Ayuntamientu de Quirós organiza, los díes 2 y 3 en Bárzana, la sesta edición del ""Mercáu Quirosanu"", en comuña cola Conseyería d'Industria y Emplegu, la Conseyería d'Alministraciones Públiques y delles entidaes bancaries y asociaciones del conceyu.

Nel mercáu van participar más de cincuenta artesanos, amás de cuntar con un chigre y puestos de llambiotaes y productos del país como tortos o frixuelos. Amás, y n'horariu de 11.00 a 23.00 hores, van impartise talleres pa la reciella, teatru de cai, y delles actuaciones musicales ente les que rescamplen Tuenda, Nuberu y Manolo Quirós.

El vienres pela tarde ta programada l'actuación del grupu de teatru ""Traslluz"", a los que siguirá Tuenda, grupu compuestu por Elías al bouzuki, Pepín na flauta y Ambás na voz.

El sábadu pela mañana l'Asociación Cultural ""Amigos del pan de Escanda"" organizará la XI Amuesa - Certame del pan d'Escanda. Pela tarde, y poniéndo-y en ramu a la xornada, tendrá llugar l'actuación de Chus Pedro y Manolo Peñayos, integrantes de Nuberu, a la que siguirá la gaita de Manolo Quirós."