Yá tán na cai los dos poemarios premiaos col Teodoro Cuesta 2006

"Los poemarios ""Aires de mudanza"" de Pablo Rodríguez Medina, y ""La culpa y la lluz"" de Pablo Texón Castañón, resultaron ganadores del Premiu Teodoro Cuesta, que convoca l'Ayuntamientu de Mieres, na so edición del añu 2006.
Un añu dempués de que-yos ficieran entrega del premiu, al pie de la estatua del propiu Teodoro Cuesta, la editorial Trabe asoleya los poemarios de dos de los autores mozos más prolíficos y valoraos del panorama lliterariu asturianu, siendo asina mesmo dos de los persones más representatives de lo que se vien nomando ""tercera xeneración del surdimientu"".

Nacíu en L'Entregu, Pablo Rodríguez Medina ye llicenciáu en filoloxía y axunta nel so historial premios como'l de novela Xosefa Xovellanos pola obra ""L'Arna de San Atanás"" o'l de creación lliteraria de l'Academia de la Llingua Asturiana, que consiguió cola obra ""Les Vueltes, toles vueltes"". Asina mesmo, y como queda amosao con esti poemariu, la obra poética tamién rescampla na obra de Pablo Rodríguez Medina, lo mesmo que'l teatru.

Pela so parte, Pablo Texón Castañón, nacíu en Felechosa (Ayer) ye filólogu y especialista en filoloxía asturiana. Na so carrera lliteraria algamó dellos premios como'l de la Tertulia Cultural El Garrapiellu, Fernández Lema, Cartes d'Amor y Art Nalón. Esti ye'l so segundu llibru de poesía dempués de ""Toles siendes"", col qu'algamara'l Premiu ""Nené Losada Rico"" na so edición del 2003."