El Festival Sol Celta va vivir la so quinta edición tres solucionar los problemes col Conceyu sobre la ubicación del mercáu

Una reunión ente l'Asociación Cultural Ventanilla 69 y la conceyala de Promoción Social y Cultura, Yolanda Alonso, certifició la continuidá del Festival Sol Celta depués de que l'Ayuntamientu d'Avilés refegura la ubicación solicitada pal mercáu nun primer momentu. Finalmente va celebrase ente'l 11 y 17 de xunetu.

"L'añu pasáu'l mercáu asitióse na cai Ferrería y esti añu pidimos permisu pa colocalu nel mesmu llugar, pero nos los negaron", recuerda Carlos García Rubio, secretariu de Ventanilla 69. Por esti motivu, la organización plantegóse suspender l'eventu, qu'esti añu va vivir la so quinta edición, "yá que supón casi la metá de la financiación del festival", recuerda.

En concreto, el presupuestu del Sol Celta ta ente los 10.000 y 11.000 euros, que se cubren con una subvención d'alredor de 4.000 euros del Conceyu "y lo que ganamos col mercáu, que son otros 4.000 euros. El restu cubrímoslo cola publicidá y l'apoyu económicu de los chigres", esplica García Rubio.

Tres la reunión cola conceyala, esta situación desbloquiose. "L'Ayuntamientu lo que nun quier ye qu'ocupemos la cai, pero non les places, asina que repartirémos el mercáu ente Carlos Lobo y Alfonso VI", esplica'l secretariu de la organización cultural, satisfechu por dar continuidá a un festival que yá tien feches zarraes, del 11 al 17 de xunetu, y que va dar a conocer el programa definitivu la selmana qu'entra.

De momento, yá hai dellos nomes confirmaos, como'l Koku la Manzana, Xuacu Amieva, Pepín de Muñalén, Rodrigo Cuevas o la Patrulla Dixie, ente otros. Nesta edición tolos artistes van ser mayoritariamente asturianos.