Asturies collabora col Protocolu entamáu por Kontseilua

Hasta'l 20 de xunu pueden presentase propuestes pal documentu.

Iniciativa pol Asturianu entamó'l sábadu en Xixón una charra na que se presentó énte organizaciones de la sociedá civil asturiana el procesu de redaición del 'Protocolu pa la Garantía de los Drechos Llingüísticos', un testu internacional qu'entama la organización vasca Kontseilua col sofitu d'European Language Equality Network (ELEN) que quier ser una continuación de la Declaración Universal de los Drechos Llingüísticos aprobada va agora venti años. Asina, Paul Bilbao, representante de la plataforma vasca pal desarrollu plenu del eusquera, acudió al actu celebráu na Biblioteca Pública Xovellanos p'acompañar a Inaciu Galán, presidente de la organización asturiana, na esplicación de los detalles del procesu.

Les entidaes asturianes qu'asistieron al eventu pudieron consultar les duldes que teníen sobre'l mesmu y preparase pa facer les sos aportaciones a esti protocolu que va marcar les llinies de la política llingüística y la revindicación de los derechos llingüísticos n'Europa nes décades vinientes. Les entidaes asturianes convidaes a participar, más d'un cientu, y otres que tengan interés en collaborar, van poder presentar les sos propuestes hasta'l 20 de xunu nel corréu info@iniciativapolasturianu.org. Pa ello, han de tomar como referencia la guía que se pue consultar al final d'esta noticia.