Asturies destina 370.000 euros p'ayudar a emigrantes y a los sos descendientes

Nel 2015 beneficiáronse cerca de mil persones con escasos recursos.

Esta partida de 370.000 euros va dirixida a emigrantes o descendientes d'emigrantes que carecen de pensión y tienen prestaciones mui pequeñes o niveles d'ingresos que nun-yos permiten cubrir les sos necesidaes básiques. Les ayudes tramítense al traviés del Serviciu d'Atención Social Personalizáu pa Emigrantes y l'añu pasáu llegaron a cerca de mil persones.

Arxentina y Venezuela, con 168.705 euros y 91.600 euros, de manera respeutiva, concentraron la mayoría de les ayudes, con cerca del 70 por cientu del total de los importes concedíos. El país qu'acueye al mayor númberu de beneficiaos foi Cuba, con un 54,9 por cientu del total, siguío d'Arxentina (23,4 por cientu) y Venezuela (13,05 por cientu). Estes aportaciones económiques tamién llegaron a emigrantes d'Uruguai, Brasil, Chile y Ecuador.