Los sindicatos mayoritarios piden l'apertura del "diálogu social"

"Los secretarios xenerales de CC.OO y UXT, José María Fidalgo y Cándido Méndez, pidieron-y al gobiernu que ""ponga les piles"" y abra ""bien llueu"" el procesu de diálogu social pa buscar, ente tolos implicaos, midíes que permitan contrarrestar la situación económica, llanzar l'emplegu y crear les condiciones afayadices p'afitar un nuevu modelu de crecimientu económicu.

Nuna rueda prensa entamada pa esplicar les sos demandes pal Primeru de Mayu, los dirixentes sindicales consideraron que yá pasó tiempu a esgaya como pa que seyan convocaos pol Executivu pa entamar esi alderique.

Nél que los sos principales oxetivos van ser lluchar por un nuevu modelu productivu, reforzar el sistema de proteición pa los desemplegaos y sofitar los servicios públicos d'emplegu, a la fin de que xueguen un papel más activu na recolocación de los trabayadores en paru. De la mesma manera, Fidalgo esplicó que tamién van pidi-y al Gobiernu que ""tire de la economía"", un oxetivu nel que tamién tendríen de ""alliniase"" les comunidaes autónomes, porque xestionen bona parte del gastu públicu. ""El sector públicu tien d'afitase como axente económicu y de cohesión social. La política fiscal tien d'afitar la cohesión y ayudar a tirar de la economía, y cuando ésti tire, debería despegar per otru llau, invirtiendo nes persones y en ferramientes de productividá"", sorrayó'l dirixente de CC.OO.

Tanto Méndez como Fidalgo confiaron en que l'Executivu comparta estos oxetivos, tamién destacaron la necesidá de que la CEOE ""lu acompañe"" nesta nueva etapa. ""Hai falta de que les organizaciones empresariales sigan teniendo grandes mires y nun queden no pequeño. Nesti barcu tenemos que remar toos al tiempu y abúltame que d'esta crisis económica vamos sacar delles lleiciones"", apuntó'l secretariu xeneral de CC.OO. Nesti procesu de diálogu social, nel que CC.OO y UXT ""van entrar y van salir xuntos"", los sindicatos tamién defenderán xuntos los oxetivos de les vindicaciones del Primeru de Mayu. Asina, Cándido Méndez fizo alcordanza de la importancia d'avanzar nes polítiques d'igualdá, desaniciando les discriminaciones ente homes y muyeres (la diferencia salarial ente dambos muévese ente'l 15% y el 40%) y les interxeneracionales, asina como na necesidá de que medren los salarios reales, una midida que defendió como beneficiosa pa facer fuerte la economía y l'emplegu. De fechu, la conseña qu'escueyen dambes centrales sindicales pa conmemorar esti Día del Trabayu concentra estes metes nes pallabres ""Ye'l momentu de la igualdá, el salariu dignu y la inversión productiva"".

Pa los dirixentes sindicales, lluchar por meyorar los salarios ye facelo por un modelu productivu más competitivu, onde los emplegos nun seyan tan ""fráxiles"" como lo son agora y onde la construcción y los servicios de consumu seyan cambiaos pola inversión en capital humanu y n'actividaes teunolóxiques y con valor añadíu. Otra de les sos vindicaciones permanentes, venceyada con tolo anterior, ye la de llegar a que tolos trabayadores tengan emplegos decentes y ello, esplicaron los dirixentes sindicales, desixe tener un salariu dignu y poder disfrutar d'igualdá de trabayu salarial en tolos ámbitos."