L'afición del Barça nun va poder llucir estelaes na final de Copa col Sevilla

La delegada del Gobiernu español en Madrid considera que les banderes independentistes inciten a comportamientos violentos o terroristes y de despreciu.

En concreto, Concepción Dancausa, aplica l'artículu 2.1, apartáu b, de la Llei contra la Violencia, el Racismo, la Xenofobia y la Intolerancia nel Deporte pa impedir la presencia d'estelaes nes graes del Vicente Calderón el domingu, qu'afita que "la exhibición nos recintos deportivos, na so redolada o nos medios de tresporte organizaos p'acudir a los mesmos de pancartes, símbolos, emblemas o lleendes que, pol so conteníu o poles circunstancies nes que s'exhiban o s'utilicen de dalguna forma inciten, fomenten o ayuden a la realización de comportamientos violentos o terroristes, o constituyan un actu de despreciu manifiestu a les persones participantes nel espectáculu deportivu". D'esta forma, la Policía, que va a rexistrar de manera individual a caún de los 55.000 espectadores que s'esperen na final ente'l Barcelona y Sevilla, nun permirtirá la entrada de banderes independentistes, al menos les catalanes, yá que nada nun se dixo de l'arbonaida dixebriega andaluza.

Les reaiciones tres conocer esta decisión nun se fixeron esperar y el presidente de la Generalitat, Carles Puigdemont, anunciaba la so ausencia nel partíu por ser "un frayamientu grave del derechu d'espresión de miles de catalanes", mesmu camín que siguó l'alcaldesa de Barcelona, Ada Colau: "Ye un atentáu inaceptable a la llibertá d'espresión. El Gobiernu del PP ha de rectificar", afirmó. El Barcelona tamién amosó'l so malestar y aseguró, en pallabres del vicepresidente del Área de Rellaciones Internacionales e Institucionales Carles Vilarrubí, que "llegaremos hasta onde sía necesario pa defender los derechos de los nuesos socios".