Concha repite na charra d'Ástura pa falar del TTIP

L'abogáu va facer un percorríu fonderu poles gravísimes consecuencies que l'Asociación Transatlántica pal Comerciu y la Inversión (TTIP) va tener pal campu asturianu.

Esti alcuerdu, que tán negocionando nel mayor de los secretismos Estaos Xuníos y la Xunión Europea, "constitúi un arremielgu, una amenaza, pa la ciudadanía en xeneral y un grave peligru pa l’Asturies rural en particular. Afita un desaniciu de derechos políticos, inclusive del marcu constitucional, en cuantes que, amás de tener una verdadera trescendencia llexislativa, afeuta al modelu económicu y social previstu na Constitución vixente (artículu 128 y ss), y tien finxao, mesmamente, que les revisiones y enanchamientos del tratáu queden desapartaos del poder llexislativu, correspondiendo-y estes xeres a un organismu colexáu formáu polos grandes operadores internacionales privaos del TTIP", espliquen dende Ástura, qu'añade que p’Asturies esti alcuerdu "nun ye bramente un tratáu de llibre comerciu sinon un preséu regulador y normativu que dexará fuera del comerciu, tamién internu, tolos productos que nun s’axusten a les esixencies del tratáu, incompatibles con un modelu de pequeñes producciones artesanales y d’alta calidá".

Amable Concha va averase nesta charra de títulu 'Nun vas volver a mercáu: el TTIP y la muerte de l'Asturies que conoces', "a los capítulos del TTIP qu’afeuten al accesu al mercáu de los bienes, l’agricultura y, en particular, el que ta dedicáu ensembre a les pequeñes y medianes empreses (SMEs nel Tratáu)". La conferencia va comenzar a les 20 hores y va tener como sede l'Atenéu Obreru de Xixón (Cuadonga, 7), con entrada llibre.