Partíos políticos y sindicatos valoren los datos apurríos pol Serviciu Públicu d'Emplegu

"L'Informe del Serviciu Públicu d'Emplegu Estatal ""Mercáu de Trabayu de la Mocedá 2007"", apurría la selmana pasada los datos correspondientes al Principáu d'Asturies. Nellos rescamplaba la cifra de los 18.823 mozos y moces menores de 30 años que dexaren Asturies a lo llargo l'añu pasáu.

Les rempuestes de los partíos políticos asturianos, sobre manera Izquierda Xunida y Partíu Popular, asina como dellos sindicatos como Comisiones Obreres nun se dexaron esperar.

La diputada d'IX-BA-LV, Noemí Martín, reclamó esti mesmu llunes al traviés d'una nota prensa l'adopción de midíes pa frenar ""l'éxodu de miles de mozos"" que para'l gobiernu asturianu ""siguen siendo lleendes urbanes"". ""Esta mocedá forma l'Asturies qu'Areces nun quier ver y pa la que nun tien propuestes"", aseguró Martín.

La diputada sorrayó que los discursos del presidente, tán ""cargaos d'ilusión y esperanza"", pero nun hai ""espaciu pa la realidá"". Na so opinión, ""si yá ye preocupante que nun quiera ver esa realidá, ye peor tovía que la niegue"".

Pela so parte'l secretariu executivu nacional de Nueves Xeneraciones del PP, l'asturianu Pablo Álvarez Pichel, declaró que'l bayurosu númberu de mozos qu'emigren amuesa les ""deficiencies"" de les polítiques de mocedá qu'aplica'l Gobiernu del Principáu d'Asturies. Según Álvarez Pichel la mocedá tien de colar porque nel Principáu ""nun hai ufiertes pa ellos"".

No que cinca a los sindicatos, el secretariu de Mocedá de Comisiones Obreres, Adrián Redondo Argüelles, pidió-yos al Gobiernu del Principáu y los empresarios que reflexonaren sobre les causes del ""éxodu"". ""Dalgo nun tán faciendo bien cuando, demientres que se llamenten pola falta de mano d'obra, cuasique 19.000 mozos tienen que colar a la busca de trabayu fuera d'Asturies""."