Un misil israelí mata a siete persones na Franxa de Gaza

"Na mañana del llunes, y dempués de que carros de combate israelís abrieren fueu escontra una vivienda na ciudá de Beit Hanun, nel norte de la Franxa de Gaza, resultaron muertes siete persones, incluyíes una madre y los cuatro fíos. Les siete víctimes mortales fueron identificaes polos médicos como Jadra Abu Matuq y los sos fíos Ahmad, Hana - de tres años -, Salih - de cuatro - y Rudayna - de seis -, amás d'Ayub Atallah - de diecisiete - que diba pal colexu, y Igrahim al Hjuj, miembru de la estaya armada de la Yihad Islámica, Brigaes d'Al Quds.

El direutor de los Servicios d'Emerxencia en Gaza, Muawiya Hassanain, confirmó que les muertes tuvieron llugar dempués de que los soldaos israelís abrieren fueu escontra la casa de la familia Matuq en Beit Hanun.

Un misil españó escontra'l techu del edificiu, d'una planta, nel momentu en que la familia almorzaba, según dellos vecinos de la zona. Los testigos informaron a l'axencia palestina de noticies Maan, de que dellos carros de combate y escavadores invadieron la población y dispararon escontra les viviendes palestines.

Una vocera de les fuerces israelís confirmó l'actuación de les tropes en Beit Hanun, una población dende la que les milicies palestines llanzaron coches escontra territoriu d'Israel. La fuerza aerea y una unidá de carros de combate dispararon escontra un grupu d'homes armaos que tentaben averase a los soldaos na ciudá, según la vocera, qu'aseguró que nengún edificiu foi atacáu."