Caliao acueye'l XI Alcuentru de Bandurrieros

"El pueblu de Caliao (Casu) acueye'l próximu sábadu 3 de mayu la edición del XI Alcuentru de Bandurrieros, coincidiendo coles fiestes de La Cruz. Esti añu l'Alcuentru, entamáu pola Asociación de Folclor Tradicional La Quintana, ta dedicada a la figura del bandurrieru Cefero Traviesas, vecín de Caliao y fallecíu nel añu 1995.

La Quintana lleva bien de d'años trabayando pola recuperación y tresmisión de la bandurria, instrumentu de cuerda d'abondes semeyances col rabel anque con delles carauterístiques propies que lu faen únicu. Esti llabor cola bandurria vien desarrollándolu l'asociación sobre too de la mano del músicu y investigador Daniel García de Cuesta, responsable d'un llibru y un discu sobre la bandurria, y que lleva once años entamando los alcuentros de Caliao, pueblu que cuenta cola mayor tradición bandurriera d'Asturies.

L'homenax al bandurrieru Cefero Traviesas tendrá llugar gracies a les imáxenes y grabaciones apurríes polos sos familiares, a los que se-yos entregará un recuerdu d'esti alcuentru. Más llueu, daráse pasu a un conciertu onde van tocar bandurrieres y bandurrieros veníos d'estremaos llugares d'Asturies, y de rabelistes y arrabeleros d'otres partes como Cantabria, Madrid, Toledo o la Rioxa, ente los que van tar Quique Sabaté d'Alcalá d'Henares o J.A. Martínez Porras ""Chirri"" de La Rioxa. Tamién va facese alcordanza del rabelista Paco Sobaler, d'Espinilla, cerca de Reinosa en Cantabria, y que morrió nel mes d'avientu del 2007.

Dende la organización animen a participar a toos aquellos bandurrieros que quieran, mensaxe tamién empobináu a los zanfoneros que nos últimos años participen nesti alcuentru."