Conseyería, productores y conceyos roblen un conveniu de promoción de la escanda

"La Conseyería de Mediu Ambiente y Desarrollu Rural, l'Asociación de Productores d'Escanda (Asapes), Caxa Rural y nueve conceyos asturianos roblaron la pasada selmana un conveniu pa desarrollar un plan integral de promoción y meyora de la producción y la calidá de la escanda. L'acuerdu va tar operativu hasta l'añu 2011 y dispón d'un presupuestu de 323.159 euros, según informó'l Principáu al traviés d'una nota prensa.

L'oxetivu del conveniu ye esparder la investigación pal aprovechamientu del cultivu al traviés de l'aplicación de nueves teunoloxíes qu'ameyoren la calidá final del productu.

Ente les actividaes previstes, rescampla la seleición de les meyores variedaes d'escanda, d'ente les 60 tipificaes, pa recomendar el so usu ente los productores por ser les que meyor s'adauten a los métodos de cultivu y recoyedura.

La firma del conveniu fízose cola participación de los alcaldes de los conceyos beneficiarios, responsables de Caxa Rural y Asapes y cola conseyera de Mediu Ambiente y Desarrollu Rural, Belén Fernández González, que presidió l'actu. En representación de la conseyería, tamién tuvo'l viceconseyeru de Mediu Rural, Cristino Ruano de la Haza. Los nueve conceyos participantes son Grau, Pravia, Miranda, Tameza, Somiedu, Salas, Sotu'l Barcu, Les Regueres y L.lena.

L'anovación más importante del acuerdu ye l'ampliación de los trabayos d'investigación, el desarrollu de variedaes meyoraes pal so usu nes finques dedicaes al cultivu y la utilización de semiente seleccionao con carauterístiques adautaes a los métodos actuales de cultivu y recoyedura. El conveniu inclúi tamién otres midíes de promoción como la organización de xornaes d'espardimientu de les investigaciones realizaes, charres a agricultores y otros coleutivos, ellaboración de material promocional, desarrollu de comedores escolares y participación en feries y congresos dientro y fuera del territoriu asturianu."