Cuatro nueves fiestes d'interés turísticu

"El Festival Intercélticu d'Avilés, la Feria del Salmón de Curniana, el Certame del Quesu Casín y l'Ascensión d'Uviéu fueron declaraes esti xueves ""Fiesta d'interés Turísticu del Principáu d'Asturies"". El Plenu del Conseyu Asesor de Turismu del Principáu - formáu por representantes de l'Alministración rexonal, ayuntamientos, sindicatos, empresarios, Universidá y los grupos parlamentarios de PSOE, PP ya IX -, decidieron de manera unánime, otorga-yos dicha declaración a estes celebraciones de ""reconocida fama y tradición"".

La declaración de 'Fiesta d'Interés turísticu del Principáu', que yá disfruten 35 festividaes asturianes, nun sólo reconoz la particularidá de les fiestes, sinón que pretende fomentar la so capacidá de convocatoria y tornales nun reclamu pal potencial turista.

El Festival Intercélticu d'Avilés preséntase como un actu de calter integral que xunta música, teatru, danza, artes plástiques, xuegos y mercaos tradicionales. El conseyu considera esti certame la mayor espresión artística y etnocultural dedicada a la tradición celta qu'aconceya añalmente l'alianza de Nacionalidaes Celtes del Arcu Atlánticu, integrada por Asturies, Galicia, Bretaña, Escocia, Gales, Islla de Mann ya Irlanda. El festival va celebrase esti añu, ente'l 18 y el 27 de xunetu. Avilés cuenta yá con dos fiestes declaraes d'Interés turísticu Rexonal, como son la Selmana Santa y l'Antroxu.

La Feria del Salmón de Curniana (Salas) ye la única n'Asturies dedicada, esclusivamente, a esti pexe tán valoráu, siendo, nos sos diez años d'esistencia, una de les grandes feries d'Asturies. L'actu constitúi, amás, una referencia pa tolos pesquines que celebren con esta fiesta l'entamu oficial de la temporada del salmón. Ente los actividaes qu'axunta la feria rescampla la puya del 'campanu'.

El Certame del quesu Casín (na Collada Arniciu, Casu) con más de 20 años de tradición, ta consideráu como ún de los alcuentros gastronómicos más acreditaos de la rexón, non sólo pola calidá de los productos, sinón tamién pola so organización.

Pa finar, la Fiesta de l'Ascensión d'Uviéu ta considerada, pol so calter espositivu y festivu, ""un induldable homenaxe al campu y a les sos xentes que contribuyó a conservar, a lo llargo los años, la tradición de ganaderos y agricultores na capital del Principáu""."