L'actu académicu contó con una presencia destacada de personalidaes

Representantes del mundu políticu, universitariu y social tuvieron presentes el vienres nel Teatru Campoamor.

Esti añu, como vien siendo habitual nel Día de les Lletres de los años últimos, hebo una importante representación de personalidaes nel actu académicu. Asina, en representación del Gobiernu tuvieron presentes el conseyeru d’Educación y Cultura, Xenaro Alonso, y el direutor xeneral de Planificación Llingüística y Normalización, Fernando Padilla.

Por parte de la FSA-PSOE acudieron los diputaos Elsa Pérez García y Verónica Vior, amás de dellos alcaldes: Wenceslao López (Uviéu), José Víctor Rodríguez (Cangas del Narcea), Enrique Fernández Rodríguez (Samartín del Rei Aurelio), Tomás Cueria (Casu) y Rosa Rodríguez González (Miranda). Mentes, pol PP dexáronse ver los diputaos David González Medina y Pedro de Rueda Gallardo.

Podemos tuvo una representación amplia, encabezada pola eurodiputada Tania González Peñas y los congresistes Sofía Castañón y Segundo González García. Tamién presenciaron l’actu académicu los diputaos Daniel Ripa, Emilio León, Andrés Fernández Vilanova ‘Ron’, la teniente d’alcalde d’Uviéu Ana Taboada o’l miembru del Conseyu Ciudadanu estatal Xuacu Rodríguez.

Presentes na manifestación previa pola oficialidá con baberu propiu, Izquierda Xunida contó cola presencia del coordinador xeneral Manuel González Orviz, amás de los diputaos Gaspar Llamazares, Concepción Masa, María Josefa Miranda y Ovidio Zapico. Tamién acudió l’alcalde de Mieres Aníbal Vázquez y el secretariu xeneral d’Izquierda Asturiana (IAS) y conceyal d’esta población tres l’alcuerdu eleutoral cola coalición, Faustino Zapico.

El diputáu nel Congresu Isidro Martínez Oblanca y el parllamentariu na Xunta Xeneral, Pedro Leal, foron los representantes de Foro xunto col conceyal de Noreña, Inaciu Iglesias, mientres que por Ciuadanos acudieron los diputaos Diana Sánchez Martín y Armando Fernández Bartolomé. La llista d’alcaldes completóla Amparo Antuña, d’Independientes por Noreña. Otra manera, tamién hebo una destacada representación de la formación nacionalista Andecha Astur.

Amplia foi tamién la presencia de la comunidá universitaria, encabezada pol rector nuevu, Santiago García Granda, y ente los sindicatos. Escritores, actores, periodistes completaron la llista d’autoridaes, entes los que tamién destacó Teresa Sanjurjo, direutora de la Fundación Princesa de Asturias; Ramón Rodríguez, direutor del RIDEA; o Antonio Virgili, direutor xeneral de RTPA.