4.000 muyeres participarán na carrera escontra'l cáncer

"Alredor de 4.000 muyeres tán inscrites na Carrera de la Muyer que se celebrará esti sábadu en Xixón a favor del deporte y la llucha escontra'l cáncer. El preciu de la inscripción va destináu a l'Asociación Española Contra'l Cáncer.

Central Llechera Asturiana ye'l patrocinador oficial d'esti circuitu, compuestu d'ocho carreres que percuerren el centru urbanu de les principales ciudaes españoles. Dempués de Xixón vendrán Madrid (11 de mayu); Vitoria (7 de xunu); Sevilla (5 d'ochobre); Barcelona (26 d'ochobre) y Zaragoza (16 de payares).

Como novedá de la IV edición del circuitu nacional, Central Llechera Asturiana echa a andar la iniciativa ""Cordones Solidarios"". L'oxetivu ye dar un pasu más na collaboración cola Asociación Española Contra'l Cáncer. Pa ello van ponese en venta xuegos de cordones de zapatielles de deporte al preciu simbólicu d'un euru.

La celebración de la prueba deportiva obliga a establecer ciertes restricciones de tráficu na ciudá. Asina, y según informó la Policía Local al traviés d'una nota de prensa, va quedar cortáu'l tráficu de vehículos, ente les 16.45 hores y 18.30 hores, nes cais de l'Avenida del Molinón, Carretera AS-247 dende'l Puente'l Piles, hasta la carretera GI-2, carretera GI-2 hasta'l parque'l Rinconín, Avenida José García Bernardo y Avenida Rufo García Rendueles, nel tramu comprendíu ente les cais Menéndez Pelayo y Avenida de Castiella."