XX Conciertu pola Oficialidá

"Esti vienres 25 d'abril entama'l Conciertu pola Oficialidá, qu'esti añu va tener llugar nel Pabellón de les Naciones de la Feria de Muestres d'Asturies en Xixón. Coincidiendo cola vixésima edición la Xunta pola Defensa de la Llingua, organizadora del conciertu, presenta'l cartel de más entidá, con dellos de los grupos más conocíos del panorama musical asturianu.

Al empar, y coincidiendo col protagonismu de la llingua asturiana na reforma del Estatutu d'Autonomía, el conciertu cuenta axuntar, nos dos díes de duración, al mayor númberu d'asistentes posible.

La xornada del vienres entama a les 19.00 hores col grupu ""Nuberu"", que'l mes de payares del añu pasáu anunciaba la so despidida, siendo ésti ún de los sos últimos conciertos. Completen el cartel: Llan de Cubel, Skanda, K-Nalón, Xera, Skama la Rede y Gomeru.

El sábadu 26 a la mesma hora abre'l programa ""DRD"", a los que siguirán ""La Col.lá Propinde"", los recientemente premiaos ""Tejedor"", ""Los Berrones"", ""La Bandina"", ""Dixebra"" y poniéndo-y el ramu a la xornada ""Chalaneru Sound"".

El preciu de la entrada pa caún de los díes será d'ocho euros si se merca de manera anticipada y 10 euros nes taquielles. Asina mesmo'l bonu pa les dos xornaes será de 14 euros si se merca anticipadamente y 16 en taquiella."