Padilla: "Habría d'esparder los actos de la Selmana de les Lletres Asturianes a lo llargo del añu pa tener más presencia"

Munches actividaes en pocu tiempu. Asina definió esti xueves Fernando Padilla la Selmana de les Lletres Asturianes na inauguración de la IV Feria del Llibru y el Discu n'Asturianu que se celebra n'Avilés hasta'l domingu. "Habría d'esparder los actos de la Selmana de les Lletres a lo llargo del añu pa tener más presencia", aseguró.

25 actos y 35 actividaes conformen la XXXVII Selmana de les les Lletres Asturianes, "pal mio puntu de vista demasiaos", asegura'l direutor xeneral de Planificación Llingüística y Normalización, qu'apuesta por espardelo nun futuru a lo llargo del añu pa ganar en presencia y visibilidá. Fíxolo na inauguración de la cuarta edición de la Feria del Llibru y el Discu n'Asturianu, actu nel que tuvo acompañáu por Luis Martín, presidente de l’Asociación de Llibreríes del Principáu d’Asturies; José Antonio García Fernández, xefe de serviciu de Planificación Llingüística y Normalización; y Yolanda Alonso Fernández, segunda teniente d'alcalde y conceyala del Área de Promoción Social, Educación, Ciudá Saludable y Cultura.

Na so intervención, Padilla esplicó'l cambiu d'ubicacición de la Feria, que pasa de la Pescadería Municipal Antigua a una carpa na plaza Domingo Álvarez Acebal, pa ganar en visibilidá y centralidá. "Esperamos que la xente s'anime a comprar discos y llibros", señaló en defensa de la industria frente a les descargues d'Internet,  y afaló a los ciudadanos a disfrutar de toles actividaes de la Feria.

Hasta'l domingu

La carpa instalada nesta cuarta edición va abrir les sos puertes de 11 a 14 hores y de 17 a 21 hores, de güei al sábadu, mentes que'l domingu l'horariu ye, de siguío, de 11 a 19 hores. Amás de poder mercar discos y llibros con descuentu y llevar los llibros conmemorativos de la XXXVII Selmana de les Lletres Asturianes, 'Que nun se pierda nel aire' y 'Que nun se perda nel aire', con cada compra, los visitantes van poder disfrutar de delles actividaes a lo llargo de les cuatro xornaes de la Feria.

Esta tarde, a les 19 hores, va presentase 'Fontenebrosa III: el final', de Vicente García Oliva, Premiu María Xosefa Canellada de lliteratura infantil y xuvenil, mentes que mañana, a les 17.30 hores, habrá una sesión de cuentacuentos a cargu d'Ana Morán. Darréu, a les 18.30 hores, va entamase un taller infantil colos cantares de 'Bestiariu', el discu producíu por producíu por La Fabriquina y editáu por Araz.net, empresa editora tamién d'Asturies.com.

El sábadu l'actividá va principiar a les 12 hores con una sesisón de cuentacuentos a cargu d'Irene García, pa siguir con un taller infantil colos 'Mitos d'Asturies' del llibru de Paco Abril. García va repetir a les 17.30 hores, pa, a les 19 hores, ceder el turnu a Silvia Quesada y los sos cantares.

Na xornada cabera va tener llugar l'alcuentru 'Situación del teatru n'asturianu', con Antón Caamaño y Adolfo Camilo Díaz, al meudía, y a les 13.30 hores ta previstu un concierto de Fernando Valle Roso, que presenta'l so discu últimu, 'Con estes y otres palabres'. Yá de tarde, a les 17 hores, va falar del so llibru 'Nel ríu la fame', de Pilar Arnaldo, actu que va contar cola presencia de Luis Arias Argüelles-Meres.

Pa zarrar la Feria, Susana Sela va protagonizar una actuación colos temes del so discu 'Canciones y poemes' a les 18 hores.

Na semeya, García Fernández, Padilla, Alonso Fernández y Martín.