"'Conceyos pola Oficialidá' busca atropar xente pa entamar a facer coses a nivel municipal", afirma Pulgar

Más de mediu centenar de cargos d'al menos 25 conceyos confirmaron hasta'l momentu la so participación na iniciativa 'Conceyos pola Oficialidá' qu'entama l'Ayuntamientu de Bimenes y la XDLA, que va tener la so primer aición na manifestación del vienres. La organización cívica recibió esti miércoles 1.300 euros de Somos Avilés.

"La iniciativa sal del Ayuntamientu de Bimenes y nós ponemos la nuesa capacidá organizativa", esplica Carlos Pulgar, voceru nacional de la Xunta pola Defensa de la Llingua Asturiana (XDLA), ún de los coleutivos que tomó parte nel conceyu de marzu pa poner les bases del procesu que va desendolcar na declaración otra vuelta de la oficialidá nel conceyu yerbatu'l 2 de xunetu. Asina, unviáronse cartes a alcaldes y conceyales de tol país pa que la firmen y muestren asina "el so compromisu cola defensa del asturianu y del gallego-asturiano".

Tamién pa declarar "la so intención d'asistir a la manifestación pola oficialidá del asturianu" con motivu del Día de les Lletres Asturianes (19.30 hores, Estación del Norte d'Uviéu) "nun cortexu compuestu por conceyales, alcaldeses y alcaldes de toa Asturies baxo la frase 'Conceyos pola oficialidá'". A ello, hai que sumar el so compromisu d'entamar contautos col restu de firmantes p'aiciones conxuntes que se fadríen públiques na XX Fiesta de la Oficialidá de Bimenes.

"'Conceyos pola Oficialidá' busca atropar xente pa entamar a facer coses a nivel municipal, onde la cosa ta un poco parada", asegura Pulgar. De momento sumáronse a la iniciativa "más de mediu centenar de cargos d'unos 25 conceyos, entes los que ta l'alcalde de Bimenes, la corporación completa d'A Veiga y la vicealcaldesa d'Uviéu, Ana Taboada", apunta'l voceru de la XDLA, qu'añade que la llista definitiva va anunciase'l vienres tres la manifestación.

"La iniciativa nun va aparar tres el Día de les Lletres, sinón que va continuar depués de cara a siguir sumando apoyos con vistes a la declaración d'oficialidá de Bimenes", añade Pulgar.

Entrega de les dietes por desplazamientu de Somos Avilés

El voceru nacional de la XDLA tuvo esta mañana presente na Casa Conceyu d'Avilés, onde recoyó'l cheque por valor cercanu a les 1.300 euros qu'entrega'l grupu municipal de Somos Avilés al coleutivu cívicu p'ayudar "a sufragar los gastos que conlleva la so actividá". Esta cantidá correspuende a les dietes por desplazamientu de los ediles de la candidatura de xunidá popular del primer trimestre del 2016, una iniciativa de la qu'enantes se beneficiaron los enzarraos de FAHIME y los treces vixilantes de seguridá del Hospital San Agustín acampaos frente a les instalaciones del centru como protesta al tar meses ensin cobrar.

Dende la organización cívica agradecen esti xestu, que se xune al anunciáu hai tiempu pola Fundación Caveda y Nava d'entregar parte del so remanente tres la so disolución a esti coleutivu, cantidá que tamién podría tar cercana a los 1.400 euros. "Estes aiciones demuestren que'l trabayu del movimientu de reivindicación llingüística ye valoratible; anímanos a siguir trabayando", asegura Pulgar.

Otra manera, hai que destacar que los cinco ediles de Somos Avilés firmaron el so compromisu cola iniciativa 'Conceyos pola Oficialidá'.

Na semaya, Xune Elipe, Pulgar, Yolanda Suárez, Eva Fernández y David Salcines nel momentu de la entrega del cheque frente a la Casa Conceyu d''Avilés. Nun pudo tar presente l'otru edil de Somos Avilés, Primi Abella, por motivos llaborales.