Bacotexo va actuar nel actu académicu pol Día de les Lletres Asturianes

La banda de rock en gallego-asturiano va encargase de zarrar l'eventu del Campoamor.

Acabante de presentar el so tercer discu, 'A guerra dos mundos', y de participar nel 'Homenaxe ás nosas letras' el sábadu pasáu n'A Veiga dientro de la programación oficial de la XXXVII Selmanda de les Lletres Asturianes, Bacotexo va tar tamién presente nel actu institucional de l'Academia de la Llingua Asturiana (ALLA) d'esti vienres, Día de les Lletres Asturianes. Van ser los encargaos de zarrar l'actividá qu'acueye l'uviedín Teatru Campoamor a les 20.30 hores, con permisu de la tradicional interpretación a la gaita del himnu del país.

"Vai ser un honra pra nosoutros pechar el Día das lletras asturianas este venres, 6 de mayo, nel Teatro Campoamor. Iba prestarnos ver cómo estos sitos s'enchían tamén con xente del occidente d'Asturias!", apuntaba'l grupu en redes sociales. Enantes van pasar pel escenariu el cantante de tonada Andrés Cueli, acompañáu a la gaita por Álvaro Fernández Fernández, el dos vegaes ganador del Troféu MacCrimmon nel Festival Interceltique de Lorient, no que va ser l'entamu del eventu.

Darréu, tendrá llugar la xunta estraordinaria de l'ALLA, na que se va acoyer a los dos académicos nuevos: Pablo Suárez García y Xosé Antón Suárez Puente. Tres la llectura del discursu institucional de la presidenta Ana María Cano, la llectura d'una esbilla de poemes de la espublización 'Lliteratura 32' va servir pa completar l'actu.

Espicha nel Llagar Herminio

Tres l'eventu del Campoamor, l'ALLA va celebrar la tradicional espicha nel Llagar Herminio, en Cualloto. P'acudir ye necesario confirmar asistencia mientres el día de güei nel teléfonu 985.21.18.37.