Los productores de lleche quieren una negociación ensin mediación sindical

"Los ganaderos de Galicia, Asturies, País Vascu y Castiella y Lleón quieren trabayar en comuña pa ser ellos mesmos, ensin mediación sindical, los interlocutores direutos coles industries de lleche pa poder atopar asina una solución a la difícil situación creada pola mor de la baxada de precios, que llegaron a tar a nueve céntimos d'euru por llitru nos caberos dos meses.

P'algamar esti oxetivu vienen celebrándose delles xuntes. El puntu d'alcuentru del aconceyamientu d'esti xueves foi l'Ayuntamientu d'A Pastoriza en Galicia, onde se desplazaron cientos de productores de lleche de Castiella y Lleón, Asturies, País Vascu y Galicia.

Ún de los voceros de la iniciativa, el lleonés Sergio García, informó de que l'oxetivu ye, cuando finen les reuniones, crear una ""especie"" de Mesa de la Lleche qu'actue d'un mou permanente y que tea formada ""por ganaderos y pa ganaderos"", na que cada provincia tea representada por un productor. ""Esta mesa va se la que decida toles aiciones a tomar, que puen ser de promoción, fuelga o lo que faiga falta"", adelantó.

García sorrayó que ""nun tienen nada"" escontra les organizaciones sindicales, pero que ""en xeneral"" creen que ""nun tán defendiendo bien los sos drechos"". Poro, aseguró qu'esti coleutivu quier ""facer dalgo pa xuntar a los productores"" y ""non como pasa colos sindicatos, que paez que van unos per un llau y otros per otru""."