Izquierda Xunida va llevar les competencies d'asturianu n'Uviéu

La Conceyalía de Cultura, con Roberto Sánchez Ramos 'Rivi' como responsable, va encargase de la promoción y difusión del asturianu nel Conceyu d'Uviéu. L'alcalde Wenceslao López decidió esti martes entrega-y les competencies llingüístiques a Izquierda Xunida (IX).

Somos Oviedo tamién pretendía xestionar estes competencies, anque finalmente'l primer edil decidió trespasales d'Alcaldía a Cultura. D'esta forma Rivi va llevar tolos temes venceyaos cola difusión y normalización de la llingua asturiana na capital del país, que tien como retos principales l'aprobación de la toponimia y la puesta en marcha del serviciu de normalización llingüística.

Otra manera, López decidió otru cambiu, los primeros dende l'entamu del tripartitu PSOE-Somos Oviedo-IX nel Conceyu d'Uviéu. Fernando Villacampa, de la candidatura de xunidá popular, pasa a trabayar como edil delegáu de Deportes con facultá de xestión dientro del área que lleva la so compañera Mercedes González Menéndez.