Vicente Gotor, nuevu rector de la Universidá d'Uviéu

"El caderalgu de Química Orgánica de la Universidá d'Uviéu, Vicente Gotor, ye dende esti xueves el nuevu rector de la Institución académica uvieina, al imponese na segunda vuelta de les votaciones a la caderalga de Drechu Internacional Públicu y Rellaciones Internacionales, Paz d'Andrés. Gotor algamó 4.521 votos - el 63,25% - énte los 2.647 - el 36,75% - algamaos por Paz d'Andrés.

Vicente Gotor agradeció l'apoyu recibíu, sobre manera'l de los mozos que son ""el futuru de la institución"" y destacó qu'a partir d'agora va ponese a trabayar teniendo como misión cumplir l'eslogan de la so campaña, ""Únenos la Universidá"". ""Ábrese agora un momentu d'alderique pa llograr universitarios llibres"", dixo Gotor, qu'aseguró que ""toos son necesarios pa formar el futuru de la universidá"".

El nuevu rector indicó que'l so programa electoral ye'l so contratu cola Institución académica, tando dispuestu a escuchar a tolos que tengan dalgo que dici-y. ""Esta ye la victoria d'un movimientu de cambiu real pa sacar a la lluz lo meyor de la Universidá d'Uviéu"", manifestó Vicente Gotor.

Pela so parte, Paz d'Andrés, agradeció'l ""notable"" apoyu recibíu per parte de la comunidá universitaria y aseguró que presentase como candidata al rectoráu foi una ""esperiencia mui positiva"". ""Viví coses agradables y coses menos agradables, pero toes merecieron la pena"", dixo D'Andrés, qu'ofreció la so collaboración ""lleal"" al nuevu rector. La caderalga de Drechu recordó qu'ella foi la primer muyer dempués de 400 años d'Universidá d'Uviéu que se presentaba pa ocupar el cargu de rectora y manifestó que ""hai que saber esperar"" y el so turnu ""va llegar bien llueu"".

Paz Andrés sorrayó qu'agora entama una nueva etapa na que Gotor va tener qu'amosar que ye'l ""rector de toos"" y indicó que'l so equipu va defender les sos idees, a vegaes con alcuerdu y otres con diferencies, pero nunca cayendo nes descalificaciones.

D'otru llau l'hasta agora rector, Juan Vázquez, agradeció'l trabayu realizáu por dambos candidatos y felicitó a Vicente Gotor pol so trunfu. Vázquez afirmó qu'ésti ye'l momentu de ""la unidá"" y añadió qu'anque tovía queden discrepancies y firíes, ye la hora de que se ""resuelvan"". ""Creo qu'agora hai que mirar p'alantre"", dixo Juan Vázquez, que tamién aseguró tar a disposición del nuevu rector pa organizar un trespasu de poderes ""tranquilu y ordenáu"" nes próximes selmanes.

No que cinca a los datos de participación, rexistráronse los votos d'un total de 1.100 de los 1.243 miembros del sector de profesores doctores de los cuerpos docentes universitarios (91,23%), 660 de los 1.073 miembros del restu de Personal Docente ya Investigador (63,65%), 4.712 estudiantes de los 24.658 alumnos de los tres ciclos (19,41%) y 870 de los 1.026 miembros del Personal d'Alministración y Servicios (85,58%)."