L'AXA critica les declaraciones d'Álvarez Areces na cumbre ente Galicia y Asturies

"L'Aconceyamientu de Xuristes pol Asturianu valora, al traviés d'una nota de prensa, les últimes declaraciones del presidente del Principáu, Vicente Álvarez Areces, al rodiu del asturianu. Areces, respondía en Santiago de Compostela a los periodistes gallegos que-y entrugaben sobre'l tema la oficialidá, que'l so partíu nun yera partidariu de la cooficialidá y qu'eso yera lo que los más de los asturianos y asturianes deseaben.

L'Aconceyamientu considera qu'estes declaraciones son ""llamentables"", porque ""pa saber la opinión d'un pueblu hai que-y la entrugar primero"". Asina, faen referencia a les encuestes sociollingüístiques realizaes n'Asturies, onde queda amosao que ""los más de los ciudadanos tán porque l'asturianu tenga un tratu asemeyáu al que reciben les otres llingües rexonales españoles"".

Asina mesmo acusen al Presidente del Principáu de nun tener el drechu de ""sofitase nel cargu pa esparder perdayuri que les sos zunes o rensíes escontra'l más importante signu identitariu del país son compartíes pola mayoría de los asturianos"", nesti casu nel contestu de la Cumbre ente Asturies y Galicia celebrada na ciudá gallega.

Al empar, recuérden-y al cabezaleru del Partíu Socialista asturianu que ""l'emplegu públicu de la llingua propia ta proclamáu pela Organización de les Naciones Xuníes y el Conseyu d'Europa como drechu humanu imprescindible ya independiente dafechu de les mayoríes polítiques de gobiernu"", polo que-y piden el cumplimientu del ordenamientu xurídicu relativu a la llingua ""nesti casu la Carta Europea de les Llingües Rexonales o Minoritaries y la Llei 1/1998, d'usu y promoción del bable/asturianu"", asina como los pactos roblaos col Plan pa la normalización social del asturianu.

Pa finar, l'AXA fai referencia a la nula presencia de la polémica sobre la denomación de la Ría del Eo na cumbre, camentando que ""la colonización televisiva gallega del occidente d'Asturies; y les iniciatives parllamentaries a la gueta de la declaración d'oficialidá de la llingua gallega na fastera Navia-Eo, son problemes de presente y de futuru que meriten daqué más del minutu"" que'l presidente Areces dixo nun dedica-y."