En Siero'l comerciu "Ye como ye"

"La conceyala d'educación, cultura y deportes del Conceyu Siero, Mª Luz Quince Cifuentes, presentó'l vienres 18 d'abril dos de les campañes que ta desarrollando esti añu'l Serviciu de Normalización Llingüística.

Dambes son posibles gracies a una subvención de la Conseyería de Cultura y Turismu, qu'apurrió una cantidá de 2000 € pa caúna na convocatoria del 2007. Edítense en comuña con otros servicios de normalización llingüística, que formen la Rede de Normalización Llingüística nos Conceyos; concretamente la de la hostelería tamién la tán repartiendo los Servicios de Normalización de la comarca la Sidra, la mancomunidá del Cabu Peñes y el conceyu L.lena; y la del comerciu los anteriores más los d'Avilés, Llangréu, Samartín del Rei Aurelio y Mieres (anque esti a fecha de güei nun ta funcionando). La Oficina de la Llingua de Xixón saca parte de los materiales.

L'oxetivu d'estes campañes ye ""reforzar l'usu y prestixamientu del asturianu en dos sectores de gran trescendencia social y onde se pue constatar cómo hai delles denominaciones tradicionales que van dexando de ser usaes nel intercambiu comunicativu"". Arriendes d'ello foméntase'l pequeñu comerciu y la hostelería con materiales con un diseñu bien trabayáu.
El sector hosteleru, tal y como esplicábamos nel casu de les campañes entamaes nel conceyu de L.lena y la Comarca la sidra, ye l'ámbitu al que va empobináu la campaña: ""Muéyate cola llingua"". Nel conceyu de Siero repartiéronse yá l'añu pasáu dellos materiales, ente los que s'alcontraben ""carpetes y dípticos esplicativos; carteles y pegatines col logotipu y eslogan de la campaña ""Equí tas en casa""; lletreros de ""Abierto / Pesllao"", ""Permítese fumar"", ""Prohíbese fumar"", ""Teléfonu"", ""Privao"", ""Homes"", ""Muyeres"", ""Acutao""; mantelinos individuales; y CDs pa poner la carta n'asturianu"". Pa siguir col llabor entamáu, edítense nesti casu 200 carteles A-3 impresos a tou color, col eslogan y los logos de la campaña, 5.000 posavasos serigrafiaos a dos tintes sobre cartón d'altu gramaxe, 625 serviyeteros de mesa serigrafiaos per dambes cares, con un poema d'Andrés Solar; y 300 carteles pa les máquines de tabacu cola prohibición de la venta a menores.
D'otru llau, y nel ámbitu del comerciu, el Serviciu de Normalización Llingüística de Siero súmase a la campaña ""Ye como ye"", que sigue cola idea d'ediciones pasaes, completando'l material d'otros años (carpetes, bolses de papel de dos tamaños, bolses de plásticu, trípticos con vocabulariu de cinco tipos distintos de tiendes, carteles promocionales, carteles de rebaxes, pegatines pa regalu y carteles con vocabulariu), con 26.000 bolses serigrafiaes per dambes cares a una tinta, col eslogan: ""Lo que te presta. Lo que quies. Lo que necesites"", amás de 200 carteles anunciadores de rebaxes, impresos a un color y plastificaos en brillu y un total de 900 marcadores d'alimentos pa carniceríes, pescaderíes y fruteríes, que van permitir cubrir 42 establecimientos."