SUATEA pide que nun se torgue la matriculación d'Asturianu y Gallego - Asturianu

"Coincidiendo cola campaña de matriculación na rede de centros educativos del Principáu d'Asturies, el sindicatu SUATEA quier recordar que ""l'asignatura de Llingua Asturiana y Gallego-Asturiano ye d'obligada ufierta"". Empobinando esti recordatoriu de manera especial a los inspectores de los centros que tienen de velar ""pol cumplimientu de toles lleis educatives"".

Asina'l sindicatu, al traviés d'una nota de prensa, espresa la so esperanza de que nel cursu qu'entama ""nun nos atopemos colos mesmos problemes de tolos años, por mor de nun ufiertar esta asignatura y nun respetar la Llei d'Usu"".

Al empar, el Sindicatu de los Trabayadores de la Enseñanza d'Asturies critica la presencia de ""ratios"" na constitución de los grupos de llingua asturiana, condición que, dende'l so puntu de vista, torga'l drechu a estudiar asturianu de los alumnos que queden condicionaos ""a la escoyeta de los compañeros y compañeres d'estudios"".

Pa finar, rellaciones direutamente les situaciones de ""indefensión"" que vive'l coleutivu d'enseñantes de llingua asturiana y los sos alumnos, cola condición llegal de la llingua. Polo que sorrayen que pa que l'asturianu tea presente nes escueles asturianes ""en condiciones dignes y de normalidá"" fai falta que ""se-y dea a la nuesa llingua'l rangu llegal que yá tienen el restu les llingües del Estáu: la oficialidá"". D'esti mou, y n'opinión del sindicatu, l'asturianu y el gallego - asturianu dexaríen de ser una materia de segundu orde nel ordenamientu educativu d'Asturies."