La folixa pa los más pequeños nel XXVIII Conciertu pola Oficialidá va principiar a les 16.30 hores

Yá ta la reciella mordiéndose les uñes por ver a Pop Piquiñín el sábadu na carpa de la plaza de la Catedral d'Uviéu nel XXVIII Conciertu pola Oficialidá. L'actuación ta prevista pa les 18.30 hores, pero la diversión va principiar a les 16.30 hores, dos enantes.

Peke Pikoteo Fábrica de Diversión va encargase d'animar a los más pequeños con pintacares y un taller de coreografíes. Les actividaes van desendolcase fuera de la carpa, anque si hubiere mal tiempu pasaríen al interior de la mesma. ¡Qué meyor manera pa calecer motores pa cantar darréu con Pop Piquiñín!

Tres el conciertu, padres, güelos y fíos van poder disfrutar hasta que'l cuerpu aguante de les fomaciones que convocaron esti añu la Xunta pola Defensa de la Llingua Asturiana (XDLA) y Xunta Moza. Tuenda, Vrienden, Nacho Vegas y el Coru Al Altu la Lleva, Dixebra y Skontra conformen el cartelu, con entraes a 8 euros anticipada y a 10, na puerta.

Los puntos de venta son los siguientes: L'Esperteyu Chigre Folk y Cervecería Malá Strana, n'Uviéu; Café Trisquel Chigre y Sidrería Canteli, en Xixón; El Cafetón, n'Avilés; Pub Creisi, en Candás; La Palmera, en La Pola Ḷḷena; Abre César, en La Pola Siero; L'Abellugu, en Mieres; Llibrería Las Dos Vías, en Grau; Sidrería Los Pegoyos, n'Arenas; CSA La Semiente, en L'Entregu; y Bar Azul, en Cangas del Narcea.