Los 'xuegos' de guerra con escolinos en Cabo Noval lleguen al Congresu

Izquierda Xunida (IX) y Podemos carguen contra esta iniciativa que llevó'l vienres al cuartel del Exércitu español en Noreña a 200 escolinos asturianos y treslladen l'asuntu al Congresu. La embaxada de Palestina, molesta por que s'utilizara'l pañuelu palestín pa identificar al enemigu nun simulacru de guerra.

Marwan Burini, secretariu de la embaxada, púnxose en contautu con Gaspar Llamazares pa tresmiti-y el so sentir por esti fechu. "Ye inadmitible lo que se fixo esta fin de selmana colos xuegos de guerra, que nun son pa neños; nun formen parte de nengún programa formativu. Pero tampoco paecen p'adultos, porque provocaron un conflictu diplomáticu, yá que la propia embaxada palestina anuncia una protesta formal, y amás una protesta contundente énte'l Gobiernu español por utilizar el pañuelu palestín como un elementu que formaba parte d'esti xuegu de guerra por parte de los enemigos y de los terroristes”, afirmó'l diputáu d'IX na Xunta Xeneral.

Alberto Garzón, voceru d'Unidad Popular, plataforma na que participa IX, rexistró trés entrugues nel Congresu pa qu'esclarie esti asuntu. En concreto pide esplicaciones sobre qué valores se pretenden inculcar en neños y de qué programa formativu se trata, y los fines que se persiguen aparentando una batalla con ruíu de petardos y cuáles foron las cleves para que al supuesto enemigo se-y disfrace con pañuelos palestinos. Amás, reclama información sobre quién foi'l responsable de la 'perfomance'.

Demanda de responsabilidaes

El diputáu nel Congresu de Podemos por Asturies, Segundo González, tamién esixe esplicaciones al ministru de Defensa en funciones, Pedro Morenés, nunes cuestiones rexistraes na Cámara baxa. Asina, entruga-y si va pidir responsabilidaes “polos conteníos belicistes y xenófobos del programa de formación de les visites d'alumnos d'institutu al Reximientu Príncipe del acuartelamientu asturianu de Cabo Noval que tuvieron llugar el pasáu vienres 15 d'abril”.

"Nun ye normal que nunes instalaciones dependientes del Ministeriu de Defensa s'escenifique un exerciciu de combate nel que l'oxetivu sía ‘neutralizar’, usando llinguaxe de guerra, a los que lleven pañuelu palestín”, aseguró al entender qu'esta decisión supón “criminalizar, énte los güeyos d'un bayurosu grupu d'escolares, non sólo al pueblu palestín y a los pueblos árabes nel so conxuntu, sinón tamién a cualquier persona que cuente ente la so indumentaria col pañuelu palestín, una prenda bastante habitual na nuesa sociedá”.

González llamenta tamién que'l Gobiernu del PP “boicoteara nel so momentu una asignatura como Educación pa la Ciudadanía, cola que se pretendía afianzar na comunidá educativa valores como'l respetu a la diversidá y la solidaridá ente los pueblos y, pel contrario, consienta y emponder l'adoctrinamientu militar d'escolares en cuarteles y con armes de fueu”.

Otra manera, Podemos tamién demanda al conseyeru d'Educación y Cultura, Genaro Alonso, que salga a dar esplicaciones por esti asuntu.

Exercicios d'entrenamientu militar

Los centros que participaron el vienres nestos 'xuegos' de guerra en Cabo Noval foron el IES Doña Jimena (Xixón), el CP Turiello (La Felguera), l'IES Alto Nalón (Los Barreros), el CP Santo Tomás de Aquino (La Felguera) y el CEE Juan Luis Iglesias Prada (Sama). En total foron 200 los escolares que, nun primer momentu, vieron un videu esplicativu de l'actividá militar pa depués facer un exerciciu d'entrenamientu militar, garrar armes y xubir a vehículos, y presenciar un simulacru de combate.

Nesti últimu, pa identificar a los enemigos, en teoría supuestos yiḥadistes, utilizáronse 'kufiyya', l'emblemáticu pañuelu palestín.