Samartín del Rei Aurelio entama la campaña 'Da-y vida a los llibros'

Empieza esti martes y va poner en circulación mediu millar de títulos hasta'l 6 de mayu.

Los exemplares que la Conceyalía de Cultura distribúi son de lliteratura universal, exemplares clásicos y llibros sobre'l conceyu, que se van repartir nos centros sociales de Samartín, la Casa de la Mocedá y la Casona del Bravial. 'Da-y vida a los llibros' ye, en definitiva, un programa de trueque de llibros col que se persigue fomentar la llectura entre la ciudadanía y, al empar, reutilizar llibros rescataos del escaezu pa que tornen a ser lleídos.

La iniciativa ta enmarcada nos actos de conmemoración del Día Internacional del Llibru, que se celebra'l sábadu, y cuenta cola collaboración de la Conseyería d'Educación y Cultura. Amás, el vienres y el sábadu, l'Asociación Cultural y de la Fiesta Plaza San Roque va poner un espositor con llibros na avenida de La Llibertá, en Blimea, con títulos cedíos polos vecinos y por COXERSA –recoyíos de contenedores de reciclaxe de papel– pa la so reutilización. Cualquier persona que se acerque perhí, n'horariu de mañana o tarde, podrá llevar un llibru siempre qu'entregue otru a cambiu.

Cuentacuentos, una conferencia del actor y direutor teatral Borja Roces el martes próximes, llectures d'entremeses de Cervantes per Radio San Martín o una esposición na Casona del Bravial sobre los sos seis años de vida, que s'inaugurará'l día 27 y que tamién ta enmarcarda nos actos de la Selmana de les Lletres Asturianes, completen les actividaes previstes pa estos díes en Samartín del Rei Aurelio.