Xunta Moza camienta que "la llingua asturiana yá gano estes elecciones"

"Los 28.000 miembros de la comunidá universitaria asturiana tán convocaos a participar, en segunda vuelta, pa escoyer ente los candidatos Paz d'Andrés y Vicente Gotor quién será'l nuevu rector de la Universidá d'Uviéu nunos comicios marcaos pola presencia de la llingua asturiana en dellos de los programes.

Xunta Moza, estaya de mocedá de la Xunta pola Defensa de la Llingua Asturiana, espresa, al traviés d'un comunicáu de prensa, el so convencimientu de qu'al marxe de los resultaos d'esti miércoles, ""la llingua asturiana yá ganó les elecciones"". Esta afirmación respuende al calendariu de reuniones entamáu pola propia Xunta y los cuatro candidatos col envís d'ufierta-yos un decálogu de propuestes ""prioritaries pa la dignificación de la llingua asturiana na Universidá d'Uviéu"". Dende la Xunta Moza quieren sorrayar que ""los dos candidatos, Vicente Gotor y Paz d'Andrés, asumieron públicamente como propies toles nuestres propuestes"".

Xunta Moza amás, retrucó a les declaraciones de la organización CUPA, na que pidía'l votu pa Vicente Gotor. Nesti casu la Xunta pretende esclariar que foi ella ""la organización qu'entamó la campaña pola defensa del asturianu na Universidá nes pasaes elecciones a rector del añu 2004"" roblada por Vicente Gotor, y que nesti casu, y con una campaña similar, los dos candidatos asumen les sos propuestes, polo que ""quier treslladar les meyores felicitaciones a los dos candidatos pol so compromisu nel respetu a los derechos llingüísticos de la comunidá universitaria"".

Pa finar la Xunta Moza sorraya que ""el consensu llográu ye un ésitu ensin precedente y un síntoma claru d'avance social de les posiciones favorables a la llingua asturiana"", llingua que ye ""un patrimoniu común de tolos asturianos y asturianes, per enriba d'ascripciones sectoriales, polítiques y/o ideolóxiques; por ello, la Xunta Moza quier recordar que la defensa de la llingua asturiana ha facese siempre dende'l respetu más estrictu a la pluralidá de la sociedá asturiana""."