El Muséu del Pueblu d'Asturies presenta un llibru sobre baille y danza n'Asturies

"El Muséu del Pueblu d'Asturies acaba presentar el llibru ""Baille y danza tradicional n'Asturies"", númberu ocho de la Serie Etnográfica. El testu xunta les ponencies y comunicaciones presentaes na celebración de les Xornaes d'Estudiu convocaes pol muséu y desarrollaes ente Xixón y Avilés n'abril y xunetu de 2007, cola collaboración de la Conseyería de Cultura y Turismu del Principáu d'Asturies.

Nestes xornaes participaron conocíos especialistes del baille y la danza n'Asturies, asina como tolos estayes venceyaes a l'actividá: grupos de baille, escueles de música tradicional, Alministración del Principáu, Universidá d'Uviéu y estudiosos en xeneral.

Les xornaes fueron les primeres con calter monográficu dedicaes al baille asturianu, dempués d'un procesu de recuperación entamáu por delles asociaciones ya investigadores que, dende mediaos de los años setenta, vienen faciendo bien de trabayos de campu pa evitar la desapaición d'esta parte del nuestru patrimoniu, custodiáu anguaño nel Archivu de la Música Tradicional del Muséu del Pueblu d'Asturies, y fomentáu poles Escueles de Música Tradicional y les actuaciones, seminarios y actividaes d'espardimientu desarrollaes por delles asociaciones asturianes.

El llibru, editáu por Ediciones Trabe y coordináu por Fernando Ornosa, responsable del archivu de Música Tradicional, contién amás un DVD tituláu ""El baille na tradición asturiana"", que recueye los principales bailles asturianos interpretaos por Conceyu de Cultura Tradicional Vezos Astures."