L'Ayuntamientu de Xixón regala flores a los usuarios de les biblioteques

"El conceyal d'Educación y Cultura, Justo Vilabrille, anunciaba la pasada selmana nel Centru de Cultura Antiguu Institutu, les actividaes organizaes dende la Fundación Municipal de Cultura con motivu del Día del Llibru. Ente elles taría la collaboración col Xardín Botánicu pa que los sos visitantes reciban un llibru, o'l repartu de flores pa los usuarios de la Rede de biblioteques municipales.

Vilabrille dixo que la so intención nun yera organizar actividaes ""importantísimes"", sinón diversificar los espacios onde se faen p'averar la llectura y la lliteratura a los ciudadanos. Asina, anunció la creación del premiu añal ""Maria Elvira Muñiz"", profesora y escritora xixonesa agasayada de recién cola Medaya de Plata de la ciudá.

Tamién tarán convocaos otros trés premios nes categoríes d'entidaes o empreses privaes, centros educativos y medios de comunicación. Los premios quedaron alcordaos nel aconceyamientu del Conseyu Asesor del pactu ciudadanu ""Gijón por la lectura"". Nengún de los cuatro tendrá dotación económica.

Xunta col edil, tamién faló na rueda prensa'l responsable de la Rede de biblioteques municipales de Xixón, Carlos González Espina, que faló d'una de les actividaes programaes pal Día del Llibru, na que se convoca un concursu, nel Centru de Cultura Antiguu Institutu, pa pone-y testu a un llibru d'imáxenes. El certame, que tará abiertu dende'l día 23 d'abril hasta'l 31, va empobináu tanto a los neños y neñes como a los adultos. Éstos van tener qu'imaxinar una historia a partir d'unes imáxenes basaes nel llibru ""Una niña""."