Castañón lleva la demanda de la especialidá a la Comisión d'Educación del Congresu

Podemos presenta una proposición non de llei nel que demanda midíes d'apoyu a la docencia n'asturianu y aragonés en Secundaria, Bachilleratu y Formación Profesional. Pide la creación de la especialidá pese a nun ser llingües cooficiales, asina como los mesmos derechos que'l restu de los idiomes del Estáu.

La diputada de Podemos por Asturies, Sofía Castañón, y el diputáu de Podemos por Uesca, Jorge Luis Bail, metieron nel Rexistru del Congresu la proposición pal so debate y aprobación na Comisión d’Educación de la cámara baxa cola intención de que naquelles comunidaes autónomes nes qu’esistan llingües non oficiales que gocien de proteición oficial y formen parte del currículu, casu del asturianu y del aragonés, los cuerpos de caderalgos y de profesores de enseñanza secundaria puedan tener "asina mesmo, a pidimientu de la comunidá autónoma y según necesidaes educatives, la especialidá propia de la llingua respectiva". Nagua por que "les alministraciones correspondientes determinarán l’atribución docente a les mentaes especialidaes por analoxía colo dispuesto nel real decretu pa la especialidá de llingua castellana y literatura".

La formación morada pide "tomar en consideración" el dictamen del Conseyu Escolar del Estáu "modificando’l Real Decretu 665/2015, de 17 de xunetu, pol que se desarrollen determinaes disposiciones relatives al exerciciu de la docencia na Educación Secundaria Obligatoria, el Bachilleratu, la Formación Profesional y les enseñances de réxime especial, a la formación inicial del profesoráu y a les especialidaes de los cuerpos docentes d’enseñanza secundaria". Dambos diputaos consideren necesario que los poderes públicos se comprometan a garantizar l'enseñu del asturianu y del aragonés "en tolos niveles y graos nos términos qu’estipulen les determinaes lleis y disposiciones normatives autonómiques y que se garantice al profesoráu d’estes llingües los mesmos derechos que s’otorguen al d’otres llingües d’España que sí son cooficiales".