Los estudiantes universitarios escueyen nes urnes les sos demandes prioritaries

El procesu 'Garramos la pallabra' entra na fase de consulta de cara a presentar les esixencies a los candidatos a rector.

Tres trece Ágoras nes facultades y ún conxuntu pa recopilar toles propuestes y preocupaciones de los estudiantes de la Universidá d'Uviéu, recoyendo 297 idees qu'abarquen dende problemátices concretes de cada centru a otres más xenerales de la universidá o'l sistema, 'Garramos la pallabra' entra nuna fase nueva. Los 22.000 alumnos y alumnes de la institución deciden dende esta mañana y hasta'l miércoles, nun procesu participativu ensin precedentes, les sos demandes prioritaries pa presentar a los cuatro candidatos a rector.

Pa ello empleguen papeletes n'asturianu y castellanu con delles entrugues que los estudiantes han de responder y introducir nes urnes que se reparten per quince facultaes, siendo les primeres esti llunes les de Psicoloxía, Química, Milán, Ciencies, Educación y Medicina del Cristo. Hai que destacar que Psicoloxía, Medicina, Bioloxía, Mieres, Ciencies, Educación, Economía, Químiques y Mines d'Uviéu van contar tamién con papeletes con problemátiques propies de cada centru.

"Les propuestes más votaes serán les que tomaremos como prioritaries na llucha pol so algame", apunten los entamadores del procestu 'Toma la pallabra', les Asamblees Abiertes de la Universidá d'Uviéu y el Conseyu d'Estudiantes de la Universidá d'Uviéu.

Cinco bloques

Les propuestes estudiantiles recoyíes nos Ágoras agrúpense en cinco bloques: tases, beques, infraestructures, tresporte y responsabilidá social. En caúna recueyen delles midíes que los estudianes nun ven reflexaes mayoritariamente nos programes eleutorales de los candidatos. 

Ente elles destaquen un descensu de les tases, un aumentu de presupuestu pa les beques d'urxente necesidá, una renovación del mobiliariu y el desaniciu total de les barreres arquiteutóniques, meyores nel tresporte y una universidá llaica "que fomente la llingua y cultures asturianes", ente otres munches.

Horarios de les votaciones

Los horarios pa efeutar la votación según cada facultá son los siguientes:

• Psicoloxía: llunes de 10 a 18 hores na mesa asiatada enfrente de la cafetería.
• Química: llunes a partir de les 11 hores na entrada al llau de Medicina.
• Milán: llunes a partir de les 10 hores nel aulariu A y martes, a partir de la mesma hora, nel edificiu departamental.
• Ciencies: llunes a partir de les 10.30 enfrente de Conserxería.
• Educación: llunes na entrada.
• Medicina (Crist): llunes na entrada.
• Bioloxía: martes de 10 a 18 hores na mesa asitiada enfrente de los conserxes.
• Economía: martes n'horariu y sitiu entovía por confirmar.
• Medicina: martes n'horariu y sitiu entovía por confirmar.
• Mines: martes a partir de les 8 na entrada.
• EPI: miércoles n'horariu y sitiu entovía por confirmar.
• Enfermería: miércoles n'horariu y sitiu entovía por confirmar.
• Derechu: miércoles n'horariu y sitiu entovía por confirmar.
• Xeoloxía: miércoles n'horariu y sitiu entovía por confirmar.
• Infromática: miércoles n'horariu y sitiu entovía por confirmar.
   

Na imaxe, les papeletes que s'utilicen na votación de la Facultá de Psicoloxía na so versión n'asturianu y castellanu.