Sánchez diz que la cumbre ente Galicia y Asturies foi "un fin de selmana ente amigos"

"El presidente del PP d'Asturies, Ovidio Sánchez, criticó la IX Cumbre ente Galicia y Asturies que se celebró esti fin de selmana en Santiago de Compostela, porque, dende'l so puntu de vista, ""nun valió pa nada"". El dirixente popular señaló que l'alcuentru quedó nuna edición de ""fin de selmana ente amigos"" pa los presidentes d'Asturies y Galicia, los socialistes Vicente Álvarez Areces y Emilio Pérez Touriño.

Sánchez fizo estes crítiques na rueda prensa que tuvo llugar esti mediudía na Xunta Xeneral del Principáu d'Asturies, na que tuvo acompañáu polos diputaos rexonales del occidente Alfonso Román, Emilio Pérez y Marcial González.

El diputáu Marcial González llamentó que na cumbre nun se falara del ""cambiu de denomación"" de la Ría del Eo por Ría de Ribadeo. Nesti sen esplicó que'l PP pidiéra-y esplicaciones per escrito al gobiernu rexonal sobre esti asuntu, contestando'l 17 d'abril que taben manteniendo alcuentros. Por embargu ""tienen una cumbre y nun falen nada del tema"".

Dende'l puntu de vista del cabezaleru popular, Ovidio Sánchez, los dos presidentes aprovechen esti tipu de cumbres pa disfrutar d'un bon fin de selmana ""culinariu"", porque, d'otra manera ""nun se fai nada"". Amás, comentó que dellos de los anuncios que se faen dempués del alcuentru a la fin ""nun se cumplen"". D'esta miente recordó que na Cumbre 2006 comprometiéronse a que tolos tramos de l'Autovía del Cantábricu taríen llicitaos o n'obres. ""En 2008 queda amosao qu'esto nun yera verdá"", comentó Sánchez.

D'otru llau Sánchez sorrayó que nun se falase del AVE del Cantábricu. ""Ye alloriante que dalgo que sirve pal País Vascu y Cantabria, nun valga p'Asturies y Galicia"". Asina, dixo qu'Areces y Touriño yeren ""comparses"" de la ""falta de compromisu"" del Gobiernu d'España pa colos ciudadanos asturianos y gallegos."