La ponencia estatutaria trata'l marcu competencial asturianu

"Demientres que'l voceru del PSOE, Fernando Lastra, declara partidariu al so partíu d'una "intervención necesaria", el Partíu Popular amuésase favoratible a llegar al máximu de les competencies permitíes pola Constitución ya Izquierda Xunida acusa a dambos partíos de torgar l'autogobiernu d'Asturies.

El voceru del PP y miembru de la ponencia, Ovidio Sánchez, mostróse partidariu de que l'Estatutu s'asitie nel ""máximu"" de lo que permite la Constitución Española. L'oxetivu ye frenar ""alderiques artificiales"" que nel futuru puedan abrir les postures contraries a la constitución. D'otru llau'l dirixente 'popular' esplicó qu'esta reforma tien de ser yá ""la definitiva"", de manera que'l Principáu puea asumir toles competencies que-y permite la Constitución.

El voceru del PP dixo que tanto'l PSOE como'l PP sigue una ""llinia constitucionalista"", dalgo que ta na ""tradición"" de les reformes n'Asturies. ""Nós nun siguimos el modelu catalán"", señaló. Asina, apostó por caltener les coses que ""tán funcionando"" nel actual Estatutu. Sánchez valoró amás l'aportación nel procesu de reforma del Lletráu Mayor de la XXPA nel procesu, Alberto Arce.

Pela so parte'l voceru d'IX-BA-Verdes y miembru de la ponencia estatutaria, Jesús Iglesias, llamentó que PSOE y PP tean llendando les posibilidaes d'autogobiernu d'Asturies. ""El conceyu d'esti llunes foi un 'tuya, mía, cabecina y gol' na portería d'IX y de tolos asturianos"", aseguró Iglesias. El voceru d'IX dixo que nel conceyu se ""impunxo"" por parte de PSOE y PP una mecánica que caltién ""no sustancial"" la estructura actual del estatutu no tocante a les competencies, refugando les aportaciones que testos como l'estatutu andaluz ofrecen p'ampliar los conteníos del testu nesa materia.

Asina, Iglesias esplicó que'l so plantegamientu yera'l de definir capítulos que supunxeren la integración de materies competenciales por bloques, como fai l'Estatutu de Castiella La Mancha y averase nos conteníos y la definición al ""modelu andaluz"", lo que diba suponer un ""saltu cualitativu importante"" pal nivel d'autogobiernu. Por embargu, Iglesias dixo que PSOE y PP aparcaron la so propuesta."