TPA emite otra vuelta 'El cuentacuentos de Presta Asgaya'..., en castellanu

La XDLA critica esta decisión del ente públicu de comunicación que "muestra la belixerancia d'Antonio Virgili" col nuesu idioma. La organización cívica esixe a los partíos que tán negociando'l mandatu-marcu qu'afiten el papel normalizador de RTPA.

La serie, compuesta por 145 capítulos, ta doblada al asturianu, idioma nel que s'emitió dos años depués de la so estrena, pero TPA principió la so redifusión esti sábadu en castellanu pese a nun tener anguaño nin un solo minutu de programación infantil na llingua del país. "Nun sabemos qué sentíu tien que la cadena asturiana emita conteníos infantiles en castellanu, más cuando los hai n'asturianu, si la ufierta de conteníos naquel idioma ta sobradamente cubierta con cadenes como ClanTV, Boing, Canal Disney o Neox, qu'emiten les 24 hores del día", apunten de la Xunta pola Defensa de la Llingua Asturiana (XDLA).

"¿Qué sentíu tien mantener una canal pública si se dedica a ufrir lo mesmo que les demás canales y nun cumple la llexislación vixente, que diz que TPA tien que tener una presencia amañosa del nuestru idioma, amás de defender la cultura asturiana?", entrúgase la organización civíca, qu'afirma que "la situación muestra la belixerancia d'Antonio Virgili, director actual de RTPA gracies al alcuerdu de PSOE, PP y IX, que, anque nel Parllamentu y de cara a la sociedá asturiana diz que ye 'partidariu' de la presencia del idioma nos medios públicos, depués marxina la presencia del asturianu y escuende la so realidá na programación".

Apertura de la negociación del mandatu-marcu

Dende la selmana pasada ta en marcha –con retrasu– na Xunta Xeneral la redaición del mandatu-marcu de la RTPA, documentu qu'afita los oxetivos de la RTPA pa los nueve años próximos y nel que debería incluyise "el papel fundamental de los medios públicos na normalización de la llingua asturiana". "Tien qu'esplicitar la cantidá y tipu de programes que s'han emitir nel nuestru idioma, tanto informativos como retresmisiones deportives, programes infantiles, doblaxes y entretenimientu, amás del papel de RTPA na promoción de la cultura asturiana y la so industria cultural", demanden dende la XDLA a los partíos parllamentarios.

Por último, esta organización recuerda que "los programes nel nuestru idioma son minoritarios na emisión, siempre dientro de temátiques mui marcaes" y apunta que "hasta que nun se recueya más esplicitamente'l papel de RTPA col asturianu, el señor Virgili va siguir faciendo tolo posible pa escondelo na emisión, usando la cadena pal so beneficiu personal. Ello ye, contra la sociedá asturiana, contra la industria audiovisual asturiana, contra la cultura asturiana y contra la so llingua d'espresión".