Intervención Xeneral equivocóse al unviar a l'Audiencia los datos sobre l'Adolfo Posada

Esti error provocó la llamada de Soledad Saavedra como testigu del 'Casu Marea'.

Tres conocese la decisión del xuez Javier Domínguez Begega d'aceptar el pidimientu de Miguel Valdés-Hevia, abogáu del acusáu Víctor Muñiz, d'Igrafo, de llamar como testigu a la muyer de Vicente Álvarez Areces pol caos contable nel Institutu Asturianu d'Alministración Pública Adolfo Posada cuando Saavedra yera xefa de Formación, el Gobiernu emitió un comunicáu nel qu'atribuyó'l desfase económicu a un error. "La Intervención Xeneral del Principáu deteuta errores nos datos unviaos a la 'Audiencia Provincial' sobre l'adquisición de bienes muebles nel Institutu Adolfo Posada", rezaba dicha nota.

En concreto, refierese a "un error material nel campu primeru del ficheru, 'centro gestor', por una incorrecta asignación de los códigos". D'esta forma, atribuyíase al Adolfo Posada "adquisiciones de bienes muebles del 2006 al 2009 por un importe total de 11.491.739,37 euros, cuando en realidá namái-y correspuenden nesi periodu adquisiciones d'estes carauterístiques por un valor máximo de 249.313,08 euros".

Pese a esti error, qu'Intervención Xeneral espera iguar pronto pa unviar a l'Audiencia un llistáu nuevu coles atribuciones correutes, Saavedra ye posible que tuviera qu'intervenir nel xuiciu al tar almitada la prueba a trámite. Sicasí, la decisión ta en manes de la seición tercera del tribunal.