Artur Mas defende la consulta popular si'l Tribunal Constitucional rebaxa l'Estatut

"El presidente de CiU, Artur Mas, alvirtió esti martes de que ""la última pallabra"" sobre l'Estatut d'Autonomía de Cataluña ""nun la va tener el Tribunal Constitucional"" y que si les sentencies de los recursos presentaos acaben por quita-y sentíu al testu, CiU va proponer ""formalmente al pueblu de Cataluña"" una consulta, ""a eso sí tenemos drechu, a que'l pueblu qu'aprobó l'Estatut vuelva pronunciase"", afirmó.

Si los fallos recorten l'Estatutu, insistió, va producise un ""choque de llexitimidaes"" y la democracia, la opinión del pueblu catalán espresada en referendu, finó Artur Mas, tien ""ciertu apoderamientu"" sobre la llei.

El dirixente de CiU esclarió que se trataría d'acatar ""xurídicamente"" la sentencia, pero ""non políticamente"". ""Esto nun ye dicir que la política tea penriba de la llei"", sorrayó.

Artur Mas esplicó esta mañana que'l cumplimientu completu del Estatutu ye una de les condiciones que CiU impón al PSOE si ésti quier caltener una rellación de cierta estabilidá cola coalición nacionalista nesta llexislatura. Especialmente, los capítulos d'infraestructures y financiación, sobre los que desixó'l cumplimientu del plazu d'aprobación d'un nuevu sistema p'agostu: ""ye posible, pero mui difícil"", reconoció.

El dirixente nacionalista esplicó qu'esta nueva financiación tien de ser frutu de la negociación billateral ente Cataluña y l'Estáu y ésti, amás tien de promover una revisión de la solidaridá interterritorial pa pone-y ""llendes"". ""Tien de siguir esistiendo, pero con llendes, porque sinón, torna n'abusu. Hai qu'entamar a dicilo"", señaló."