Jimmy Carter aconceya con representantes de Hamas

"L'ex presidente americanu Jimmy Carter, comunicó esti llunes que los dirixentes de Hamas taríen dispuestos a aceutar un alcuerdu de paz negociáu pol so rival, el presidente Mahmud Abbas, demientres qu'ésti fuera apoyáu polos palestinos nun referendu.

En pallabres de Carter, ""dicen qu'aceptaríen un estáu palestín coles llendes de 1967 si fuera aprobáu polos palestinos, anque Hamas pudiera nun tar d'alcuerdu con dalgunos de los términos del mesmu"", indicó Carter nun discursu, dempués de mantener dellos contautos en Siria y Exiptu con dirixentes de Hamas, inda'l so cabezaleru nel exiliu, Jaled Meshal. ""Esto significa que Hamas nun va torgar los esfuerzos d'Abbas de negociar un alcuerdu y que Hamas va aceptar un alcuerdu si los palestinos lu apoyen nuna votación llibre"", esplicó.

Carter y Meshal discutieron el vienres y el sábadu en Damascu cómo'l grupu islamista ignoráu por Israel y Occidente, podría tar presente nun plan de paz, abandonando asina la so oposición a les negociaciones que caltién Abbas col Estáu xudíu. Según l'ex presidente norteamericanu, dexar fuera a Hamas ""nun ta funcionando"", como queda amosao na sobrevivencia de la violencia na llende ente Israel y la Franxa de Gaza. No tocante a esta cuestión, Carter indicó que Hamas refugó la so propuesta d'un altu'l fueu unillateral de 30 díes con Israel porque nun confiaba nel respetu qu'Israel pudiera tener pa cola tregua.

La disposición de Carter a aconceyase con dirixentes de Hamas fizo que recibiera les crítiques d'Israel y d'EE.XX, yá que dambos consideren a esti grupu una organización terrorista. ""Nós pensamos que'l problema nun ye que m'aconceyara con Hamas en Siria"", afirmó Carter, ""el problema ye qu'Israel y Estaos Xuníos refuguen aconceyase con esta xente, que tien de tar implicada"", añadió. Dende'l so puntu de vista, ""nun hai nenguna dulda de que tanto'l mundu árabe como los palestinos, inda Hamas, van aceutar el drechu d'Israel a vivir en paz dientro de les llendes de 1967""."