Allugamientu de categoría pal XXVIII Conciertu pola Oficialidá: la plaza la Catedral d'Uviéu

Pop Piquiñín, Tuenda, Vrienden, Skontra, Dixebra, y Nacho Vegas y el Coru Al Altu la Lleva conformen el cartelu d'esti añu, qu'estrena allugamientu. Va ser na plaza la Catedral d'Uviéu'l sábadu  23 d'abril.

Tres la edición del añu pasáu nuna sala, la xixonesa Acapulco, el XXVIII Conciertu pola Oficialidá va volver a una carpa nun ambiente más folixeru y nun enclave de lluxu. El Conceyu d'Uviéu dio permisu a la Xunta pola Defensa de la Llingua Asturiana (XDLA) y a Xunta Moza pa celebrar esta edición na plaza la Catedral d'Uviéu.

D'esta forma, la cita cola que se pretende amosar la bayura musical en llingua asturiana y reivindicar esti derechu pa la ciudadanía asturiana gana en centralidá y, sobre manera, en visibilidá, al ser esti puntu d'Uviéu ún de los más transitaos de la capital del país. Otra manera, tamién torna a les feches tradicionales, depués de delles ediciones celebrándose a primeros de xunu.

Un cartelu tamién de categoría

Nesta ocasión les formaciones participantes, siempre de manera desinteresada, son el grupu favoritu de la reciella, Pop Piquiñín; Tuenda, col so repertoriu de música tradicional; la banda de folk Vrienden; Skontra cola so descarga punk-folk; los yá clásicos Dixebra, que nun necesiten presentación; y Nacho Vegas y el Coru Al Altu la Lleva, la gran novedá del cartelu con respeuto a ediciones anteriores xunto con Vrienden y una de les formaciones que ta teniendo un mayor ésitu de públicu a nivel estatal. Hores y hores de música n'asturianu de tolos estilos.

El comienzu del conciertu ta previstu pa les 18.30 hores y el preciu de les entraes va ser de 8 euros anticipada y de 10 na puerta. Los puntos de venta nos que van tar disponibles en feches próximes son los siguientes: L'Esperteyu Chigre Folk y Cervecería Malá Strana, n'Uviéu; Café Trisquel Chigre y Sidrería Canteli, en Xixón; El Cafetón, n'Avilés; Pub Creisi, en Candás; La Palmera, en La Pola Ḷḷena; Abre César, en La Pola Siero; L'Abellugu, en Mieres; Llibrería Las Dos Vías, en Grau; Sidrería Los Pegoyos, n'Arenas; CSA La Semiente, en L'Entregu; y Bar Azul, en Cangas del Narcea.