"Nun entendemos que nos echen p'atrás el Plan", afirma Tascón

L'encamientu de Delegación del Gobienu al Conceyu de Carreño pa qu'anule l'alcuerdu plenariu qu'aprobó'l Plan de Normalización Llingüística sorprendió al equipu de gobiernu. La edil Cecilia Tascón anuncia la intención de salvar esta situación.

"Recibimos con sorpresa la notificación de la Delegación del Gobiernu porque la idea cola qu'aprobamos el Plan yera que l'alministración llocal mirara pola llingua materna del conceyu de Carreño, con cuatro o cinco años pa dir poco a poco impulsando midíes pa la so normalización", esplica la conceyala d'Educación, Cultura y Bienestar Social.

Entiende que nun tien nada que ver con una supuesta oficialidá del idioma, como diz l'informe presentáu pola Direición Xeneral de Coordinación de l'Alministración Periférica del Estáu del Ministeriu de Facienda y Alministraciones Públiques, nel que se basa la decisión de la Delegación, y afirma que "nun entendemos que nos echen p'atrás el Plan cuando, como por exemplu, la toponimia asturiana yá ye oficial nel conceyu".

Tascón, que reconoz la posibilidá de tener que cambiar la forma de tramitación y facelo como una ordenanza, ta pendiente agora de la resolución de los servicios xurídicos del Ayuntamientu pa tratar l'asuntu nel Plenu d'esti xueves, anque la intención del equipu de gobiernu del PSOE ye la de defender el documentu aprobáu'l 28 de xineru colos votos a favor de Somos Carreño y Izquierda Xunida, y colos únicos en contra del Partido Popular. Precisamente el grupu municipal popular foi'l qu'impugnó l'alcuerdu plenariu énte la Delegación del Gobiernu estatal n'Asturies, dalgo que yá anunció'l so voceru José Ramón Fernández Gutiérrez en dichu Plenu.

Interpretación peculiar de la Llei d'Usu

Carreño tien un mes, dende'l 22 de marzu, p'anular l'alcuerdu plenariu qu'aprobó'l Plan de Normalización Llingüística. Pa ello, l'órganu representáu por Gabino de Lorenzo señala defeutos de forma nel so procedimientu y una interpretación de que les midíes de promoción nun correspuenden a los conceyos nuna llectura de la Llei d'Usu contraria a la so lletra.

Asina, esti reglamentu afita nel so puntu 1 del Artículu 8 que "los ayuntamientos asturianos podrán adoptar les midíes necesaries p'asegurar la efectividá del exerciciu de los derechos llingüísticos qu'esta Llei otorga a los ciudadanos residentes n'Asturies", dalgo que l'informe de Madrid escaez de forma sorprendete.