El Farho Xixón Baloncestu nun mató al Sabadell

"Los asturianos llegaron a tener ventayes importantes, inda d'hasta trece puntos, con parciales en delles vegaes d'ocho a cero y de trece a cero, pero nun yeren a despegase de los catalanes, que facíen ""la goma"" como nel ciclismu, pues darréu metíen ellos otru parcial de cero a ocho o de cero a nueve. Nun alcuentru ensin hestoria, l'equipu barcelonés nun se punxo delantre nel marcador en nengún momentu y la victoria xixonesa nun tuvo en peligru en tol partíu. Colos resultaos de la xornada'l Farho Xixón Baloncestu ta cuartu na clasificación a dos victories de los dos primeros, el Vic y l'Illescas. L'alcuentru entamó con un trece a cero pa los locales, anque'l Sabadell fizo ""la goma"" y de siguío metió un parcial de cero a nueve. Nesti primer periodu les ventayes diben d'esos trece puntos del entamu a trés, con un 18 a 15. Nel segundu cuartu los locales llegaron a tener once puntos de ventaya, 32 a 21, pero foi amenorgándose hasta los cinco puntos, 32 a 27, frutu d'esi averase y separtase que poníen en práctica los dos equipos. A lo cabero'l periodu'l resultáu yera un 36 a 29.

Tres el descansu paecía que los xixoneses diben a frayar l'alcuentru, pues teníen ventayes mui cómodes d'ente ocho y trece puntos y a lo cabero'l cuartu la ventaya yera de doce puntos, 61 a 49, pero nun acababen de matalu. Nel últimu cuartu los locales siguíen delantre nel marcador y, anque hebo dos parciales favoratibles al Sabadell de cero a ocho y cero a nueve y otru pa los locales d'ocho a cero, la separtación nel lletrónicu nunca baxo de los seis puntos a favor de los xixoneses.

Gran partíu de Matt Kiefer que de los venticuatro puntos que metió, venti metiólos na primera parte, y amás garró seis rebotes. Tamién hai de destacar nos locales a Wolfram con dobles figures -quince puntos y diez rebotes-, a Curtis Bobb -once puntos y trés rebotes- y a Adrián García -ocho puntos y siete rebotes-. Nel equipu catalán el más destacáu foi Francesc Cabeza -quince puntos y seis rebotes-.

Ficha técnica:

Farho Xixón Baloncestu:
Rubén Suárez (8), Sony Vázquez (4), Curtis Bobb (11), Brandon Wolfram (15) y Matt Kiefer (24).
Tamién xugaron: Adrián García (8), Peter Rajniak (2), Chus Pineda, José María Balmón (3) y David Jandl.

Imaje Sabadell Gapsa:
Magi Velázquez, Marc Sobrepera (4), Manuel Guzmán (10), Sergi Pino (5) y Xavi Ventura (14).
Tamién xugaron: Xavier Guirao, Xavier Costa (4), Marc Solá (13), Francesc Cabeza (15) y Ángel Valdez.

Árbitrios: Raúl Blanco y José María Valle.

Nel Farho Xixón Baloncestu nun hebo xugadores eliminaos por cinco faltes personales y nel Sabadell foi elimináu Xavi Ventura (minutu 39).

Partíu de la trenta xornada de la Lliga Adecco LEB Plata, xugáu nel Palacio de los Deportes de la Guía, cola asistencia d'unos mil espectadores.

Parciales per cuartos: 20-15, 16-14, 25-20 y 14-16."