"Nun queremos refundar una comunidá autónoma nueva"

"El voceru del PSOE y miembru de la ponencia pa la reforma estatutaria na Xunta Xeneral del Principáu, Fernando Lastra, declaró esti llunes que'l so partíu ye partidariu d'aplicar na reforma'l principiu de ""intervención necesaria"". Asina, esclarió la postura del so partíu dende la ""igua del estatutu"" y non ""la ellaboración d'ún nuevu"".

Lastra fizo estes declaraciones dempués de participar nel aconceyamientu de la ponencia de la reforma estatutaria celebráu esta mañana na Xunta Xeneral. ""Vamos intervenir nos casos onde faiga falta, pero onde nun seya necesario, nun cambiaremos el testu"", esplicó Lastra, señalando que nel Estatutu que tenemos anguaño hai cuestiones que ""funcionen bien y nun xeneren problemes"", y poro, neses cuestiones nun hai por qué meter modificaciones.

Na xunta d'esti llunes, según Lastra, tratóse'l tema de les competencies, garrándose la estructura del ""llistáu"", que ye la mesma estructura vixente. Asina alcordóse abordar la definición de los trés grandes grupos: esclusives, compartíes y d'execución. ""Nosotros siguimos los posicionamientos adoptaos n'otres reformes"", sorrayó'l voceru socialista.

No que cinca a les crítiques d'IX-BA-LV, nes qu'aseguraben qu'esistía un pre pactu ente PSOE y PP no tocante a la reforma, Lastra señaló que la coalición ""entovía nun entendió"" el plantegamientu de la reforma. ""IX quier un estatutu nuevu, na llinia del catalán, pero equí tamos falando namás d'una reforma"". D'esta miente Lastra fizo por evitar ""el falsu alderique"" sobre la posibilidá d'un menor o mayor grau d'autonomía. ""Esti ye un testu enmarcáu dientro d'un proyeutu nomáu España y nel qu'intentamos esparder l'estáu de les autonomíes"", ""nun queremos refundar una comunidá autónoma nueva"" dixo."