El CAO aconceya otra vuelta énte la Xunta Xeneral

"El Conceyu Abiertu pola Oficialidá aconceyó otra vuelta énte la Xunta Xeneral del Principáu d'Asturies, coincidiendo coles xuntes de los trés principales partíos al rodiu de la ponencia estatutaria. Nesti casu yeren los músicos los llamaos a participar nesti actu vindicativu; músicos que como Xune Elipe, de Dixebra, Burilo, de Skama la Rede o Santi Caleya de La Bandina, actuarán esta mesma selmana nel Conciertu pola Oficialidá entamáu pola Xunta pola Defensa de la Llingua Asturiana.

L'actu entamó a les 8:30 baxo la pancarta: ""Na reforma del estatutu, l'asturianu llingua oficial"", y nél tamién participaron dellos representantes de partíos políticos, como los diputaos d'IX-BA-LV, Francisco Javier García Valledor y Noemí Martín. Asina mesmo'l presidente del Partíu Popular Asturianu, Ovidio Sánchez, saludó dende les escaleres de la entrada principal a les persones ellí concentraes.

Según esplicó Fernando Ornosa, voceru del Conceyu abiertu pola Oficialidá, el CAO cuenta organizar esti tipu de concentraciones demientres dure'l procesu de negociación del estatutu. Siendo la próxima cita'l llunes 28 a les 9.30 hores. ""Y si cambien la hora, cambiaremos nós la nuestra"", finó."