"Fuentes de Invierno" pieslla una temporada de 20 díes

"La nueva estación d'esquí de ""Fuentes de Invierno"" sumó un total de 3.951 usuarios nos díes que tuvo en serviciu esta temporada, del 24 de marzu al 14 d'abril. En comparanza col restu de les estaciones españoles, ya inda de la otra estación asturiana, Valgrande - Payares, los datos amuesen unos resultaos bien probes pa esta nueva estación. Por embargu'l direutor xeneral de deportes, Misael Fernández Porrón, afirmó na rueda de prensa concedida esti vienres que los datos yeren ""positivos"" y que ""la rentabilidá económica podrá demostrase en pocos años"".

La estación ""Fuentes de Invierno"" abrió concretamente 20 díes del total de 142 díes que tien la temporada d'esquí, lo que supón un 14'08%.

Pela so parte la otra estación asturiana perpasó la tasa del 50% de los díes, con un porcentaxe del 65% y 53.864 visitantes. Fernández respondió a estes cifres argumentando que la puesta en serviciu d'esta instalación coincidiera con una ""temporada atípica, con un nivel de precipitaciones mui per debaxo de lo normal""

Allargándose nestes cuestiones y dando rempuesta a les entrugues de los periodistes sobre la conveniencia de la inversión realizada (de 4.009.895 euros), Fernández dixo tar esperanzáu porque ""la rentabilidá económica pueda entamar a apaecer nunos años, yá que la nieve nesa zona caltiénse mui bien"". Recordando amás el ""campu de la rentabilidá"" que supón la ""promoción de la zona"", con una ""meyora del entornu, como puntu de referencia pal turismu de nieve""."