Bimenes busca involucrar a la sociedá asturiana na declaración d'oficialidá

Una ventena de representantes de coleutivos y partíos políticos van participar esti vienres nun conceyu entamáu pol equipu de gobiernu municipal de Bimenes. L'oxetivu d'esti alcuentru ye involucrar a tola sociedá asturiana na declaración d'oficialidá.

La cita ye esta tarde, a les 20 hores, na Casa Conceyu. L'alcalde Aitor García Corte recibió numberoses llamaes de persones y asociaciones interesándose na iniciativa tres trescender n'Asturies.com la so intención de declarar la oficialidá del asturianu'l próximu 2 de xunetu, polo que decidió entamar un conceyu cola fin de recoyer idees y sumar apoyos.

El primer edil cuenta cola participación d'una ventena de representantes, "anque nun quiero confirmar nenguna asistencia hasta que nun los vea ehí sentaos". Ésti ye'l segundu pasu nel procesu entamáu por Bimenes tres una primer reunión del equipu de gobiernu con téunicos municipales celebrada'l día 2.

El 5 de xunetu del 1997, Bimenes foi'l primer conceyu del país en facer oficial l'asturianu nel so territoriu, iniciativa que llueu siguieron Casu, Morcín, Castrillón, Llangréu, Llaviana y Teberga, mentes que Ḷḷena, Mieres, Riosa, Ribeseya, Amieva y Corvera manifestáronse a favor de sacar alantre midíes y planes de normalización.

Nava, pela so parte, aprobó unes ordenances d’oficialidá que, como toles otres declaraciones, foron torgaes polos recursos presentaos énte'l Tribunal Superior de Xusticia d'Asturies (TSXA), con sentencia ratificada pol Tribunal Supremu al considerar los tribunales que los ayuntamientos nun tienen competencia pa ello.