Asturies ye la comunidá onde más xubió'l preciu la vivienda nel últimu añu

"El preciu la vivienda xubió nel Principáu d'Asturies un 7,8 por cientu nos últimos dolce meses, penriba de la media nacional, onde la xuba asitióse nel 4%. Esti datu alluga al Principáu a la cabeza de les comunidaes españoles no tocante al incrementu de precios, según datos del Ministeriu de Vivienda.

Per detrás d'Asturies, los mayores incrementos rexistráronse en Galicia, Ceuta y Melilla (6,3%), País Vascu (6,0%), Andalucía (5,8%) y Estremadura (5,5%). Pela contra, los menores incrementos rexistráronse en Madrid (0,1%), Navarra (1,7%), Cantabria (2,5%), Castiella y Llión (3,2%), Comunidá Valenciana (3,5%) Castiella La Mancha (3,6%) y La Rioja (3,9%).

D'otru llau, y según los datos del Ministeriu venceyaos al cuartu trimestre del 2007, el númberu de viviendes entamaes cayó n'Asturies un 8,7 por cientu, per detrás d'Aragón (17,9%); Cantabria (-15,5%); Murcia (-11,5%), Castiella La Mancha (-10,9%); y per delantre de Galicia (-3,7%). Con tases positives, tán País Vascu, 14,7%, Estremadura, 32,4% y Melilla, 144,3%.

D'otra miente, el Ministeriu de Vivienda sorrayó que, según la estadística ellaborada por esti departamentu nel cuartu trimestre del 2007 y a nivel nacional, ""el sector de la construcción de vivienda sigue'l procesu de crisis y axuste hacia un equilibriu de mercáu, yá que nel últimu añu entamaron a llevantase 615.976 viviendes, de les que 83.859, el 13,6% son protexíes, y 532.117, el 86,4% son llibres"".

Pa finar, y no que cinca a los precios del suelu, el Ministeriu informó de qu'esti valor esperimentó n'España una baxada d'un 2,7% respeuto al mesmu periodu del 2006, asitiándose en 277 euros el metru cuadráu."